बॉलिवूडचा किंग खान शाहरूखचा (Shah Rukh Khan) मुलगा आर्यन खान (Aryan Khan) याला एनसीबीने २ ऑक्टोबर रोजी मुंबईहून गोव्याला क्रूझवर जाणाऱ्या रेव्ह पार्टीतून (Mumbai Cru) अटक केली होती. यानंतर चौकशीदरम्यान मागील ४ वर्षांपासून ड्रग्ज घेत असल्याची कबुली त्यानं चौकशीदरम्यान दिली होती. यानंतर न्यायालयाने आर्यनचा जामीन नाकारला आहे. सध्या त्याची रवानगी आर्थर रोड तुरूंगात करण्यात आली आहे. या प्रकरणामुळे केवळ शाहरुखलाच नाही तर बॉलिवूड इंडस्ट्रीला मोठा धक्का बसला आहे. यानंतर अनेक बॉलिवूडचे दिग्गज शाहरूखच्या आणि आर्यनच्या समर्थनार्थ पुढे आले होते. याप्रकरणी आता बॉलिवूडची अभिनेत्री तापसी पन्नू (Taapsee Pannu) हीनंदेखील प्रतिक्रिया दिली आहे.
"पब्लिक फिगर असल्याचं काही फायदेही असतात आणि काही तोटेही. हा फायदा आणि तोटा केवळ सेलिब्रिटींपर्यंतच नाही, तर त्यांच्या कुटुंबीयांसाठीही असतो. एका स्टार स्टेटसचा एक फायदा असतोच, परंतु यादरम्यान काही नकारात्मक गोष्टीही समोर येतात. जर तुम्ही एखाद्या बड्या अभिनेत्याची मुलं असाल, तर तुम्हाला प्रिविलेज आणि फुटेज मिळतं. त्यासोबत अनेकदा उलट गोष्टीही पाहायला मिळतात. जर पुढे येणाऱ्या समस्यांबद्दल तुम्ही आधीपासून तयार असाल तर घाबरण्याचं कारण नाही. माझ्या मते जेवढं तुमची उंची अधिक असते तेवढं तुम्ही अधिक तयारही होता," असं तापसी एका मुलाखतीदरम्यान म्हणाली.