दाक्षिणात्य सुपरस्टार महेश बाबू व मराठीमोळी अभिनेत्री नम्रता शिरोडकर यांची सात वर्षांची मुलगी सितारा लवकरच सिनेइंडस्ट्रीत पदार्पण करणार आहे. पण ती अभिनय करताना दिसणार नाही आहे. ती फ्रोझन २च्या तेलगू व्हर्जनमधील लहानपणीच्या एल्साला सितारा आवाज देणार आहे. २०१३ मध्ये प्रदर्शित झालेल्या फ्रोझनचा दुसरा सिझन लवकरच प्रेक्षकांच्या भेटीला येणार आहे.
चित्रपट व्यापार विश्लेषक तरण आदर्श यांनी सिताराच्या पदार्पणाची माहिती दिली असून फ्रोझन २ हा इंग्रजी, हिंदी, तामिळ आणि तेलुगू अशा चार भाषांमध्ये प्रदर्शित होणार असल्याचे सांगितले.
यासंदर्भात सिताराची आई म्हणजेच नम्रता शिरोडकर म्हणाली की, सिताराला फ्रोझन हा चित्रपट फार आवडतो आणि त्यातील एल्सा ही भूमिका तिच्या फार जवळची आहे. तिला चित्रपटांची खूप आवड आहे. त्यामुळे एल्साला आवाज देण्याची संधी ती नाकारू शकत नव्हती. ही संधी सिताराला देण्याबद्दल मी डिस्नेच्या टीमचे आभार मानते.