बॉलिवूडचे गतवर्ष ख-या अर्थाने अभिनेता राजकुमार रावच्या नावे राहिले. राजकुमारच्या ‘स्त्री’ या हॉरर कॉमेडी चित्रपटाने १०० कोटींच्या क्लबमध्ये एन्ट्री केली आणि राजकुमार एकदम बॉलिवूडच्या ‘ए लिस्ट अ‍ॅक्टर्स’च्या यादीत पोहोचला. गतवर्षाच्या सुरुवातीला आलेला त्याचा ‘ओमेर्टा’ हा चित्रपटही गाजला. यातील राजकुमारच्या अभिनयाचे प्रचंड कौतुक झाले. साहजिकचं या सगळ्यांच्या परिणाम राजकुमारच्या मानधनावर झाला. राजकुमारने आपल्या मानधनात वाढ केली आणि नेमक्या याच कारणाने करण जोहरसारख्या काही बड्या निर्मात्या-दिग्दर्शकांनी नाके मुरडली. एक दोन चित्रपट हिट झालेत की, नव्या पिढीच्या कलाकारांच्या डोक्यात हवा जाते. त्यांची फी अव्वाच्या सव्वा वाढते, असे करण जोहर म्हणाला. यावेळी त्याने विकी कौशल, राजकुमार राव अशा काही अभिनेत्यांची नावेही घेतली.
‘लव्ह, सेक्स और धोखा’ हा राजकुमारचा पहिला चित्रपट. पहिल्या चित्रपटातील राजकुमारच्या कामाचे अमाप कौतुक झाले. यानंतर मात्र त्याने कधीच मागे वळून बघितले नाही. कदाचित अनेकांच्या नजरेतून सुटले असेल पण ‘गँग आॅफ वासेपूर’मध्ये राजकुमार कॅमिओ रोलमध्ये दिसला होता.