मुंबई: बॉलिवूडचा परफेक्शनिस्ट आमिर खानच्या चाहत्यांची संख्या कोट्यवधींच्या घरात आहे. भारतातच नव्हे, तर जगभरात आमिरचे चाहते आहेत. आमिरची एक झलक पाहण्यासाठी चाहते गर्दी करतात. अनेकदा अतिउत्साही चाहत्यांमुळे सेलिब्रिटी अडचणीत येतात. त्यामुळे सेलिब्रिटींसाठी सुरक्षा अतिशय महत्त्वाचा विषय असतो. सेलिब्रिटींच्या सुरक्षेसाठी तैनात असणाऱ्या बॉडीगार्ड्सवर मोठी जबाबदारी असते.
आमिर खानच्या सुरक्षेची जबाबदारी एका मराठमोळ्या व्यक्तीवर आहे. त्याचं नाव युवराज घोरपडे. चित्रपटाचं प्रमोशन असो वा सार्वजनिक ठिकाणं, युवराज प्रत्येक ठिकाणी आमिर खान यांच्यासोबत असतो. आमिर खानच्या चाहत्यांची संख्या मोठी आहे. आमिर येणार असल्याची, आल्याची माहिती मिळताच चाहत्यांची प्रचंड गर्दी होते. त्यामुळे आमिरची सुरक्षा महत्त्वाची ठरते. युवराज देत असलेल्या सेवेबद्दल आमिर त्याला भरभक्कम पगार देतो.
युवराज घोरपडेंचा पगार एखाद्या कंपनीच्या सीईओइतका आहे. युवराजला वर्षाकाठी २ कोटी रुपये इतका पगार मिळतो. युवराजला बॉडी बिल्डर व्हायचं होतं. मात्र त्याला आमिरसोबत काम करण्याची संधी मिळाली. १६ व्या वर्षी शिक्षण सोडणाऱ्या युवराजनं एका सुरक्षा कंपनीत काम करण्यास सुरुवात केली. त्यानंतर त्याला आमिरची सुरक्षा करणाऱ्या टीमसोबत काम करण्याची संधी मिळाली.