रजनीकांत यांच्यासह झळकणार अंजली!

सुपरस्टार रजनीकांत यांच्यासह काम करण्याची संधी मोजक्या आणि नशीबवान कलावंतानाच मिळते. अशीच संधी एका मराठमोळ्या अभिनेत्रीला मिळाली आहे. या अभिनेत्रीचं नाव आहे अंजली पाटील. मूळची नाशिकची असलेली अंजली लवकरच रजनीकांत यांच्यासह रुपेरी पडद्यावर झळकणार आहे. रजनीकांत यांच्या आगामी ‘काला कारिकालन’ या सिनेमात अंजली झळकणार आहे. खुद्द अंजलीनं ट्विटरवरुन ही गुड न्यूज रसिकांसह शेअर केली आहे. काला कारिकालन हा रजनीकांत यांचा आगामी तमिळ सिनेमा असून त्यांचा जावई धनुष या सिनेमाची निर्मिती करणार आहे. तर कबाली फेम प. रणजिथ या सिनेमाचं दिग्दर्शन करणार आहे. या सिनेमाबाबत अंजली भलतीच एक्साईटेड आहे. चित्रपटाच्या शूटिंगसाठी चेन्नईला जावं लागल्याचंही तिने स्पष्ट केलं आहे. राकेश ओम प्रकाश मेहरा यांच्या सिनेमात काम करत असून सध्या शूटिंग सुरु आहे. जूनमध्ये हे शूटिंग संपल्यानंतर ‘काला कारिकालन’च्या शुटिंगला सुरुवात होईल अशी माहितीही अंजलीने दिली आहे. पुढील काही महिने आपल्यासाठी अधिक कामाचे आणि तणावाचे असले तरी त्यासाठी पूर्णपणे तयार असल्याचे अंजलीने सांगितले आहे. रजनीकांत यांच्यासह काम करण्यासोबतच सिनेमातील भूमिकाही विशेष लक्षवेधी असल्याने सिनेमाबाबत बरीच उत्सुकता असल्याचे सांगायलाही ती विसरली नाही.