शेअर बाजारातील भूकंपाचा अदानीच्या 'या' शेअरला मोठा फटका; थेट ₹५० वर आला भाव...

Share Market: शेअर बाजारातील घसरणीचा परिणाम अदानी समूहाच्या कंपन्यांवरही दिसून आला.

Share Market: शेअर बाजारातील घसरणीचा परिणाम अदानी समूहाच्या कंपन्यांवरही दिसून येत आहे. मध्यपूर्वेतील परिस्थितीमुळे आज बाजार मोठ्या प्रमाणात घसरला, ज्यामुळे अदानींच्या सिमेंट कंपनी सांघी इंडस्ट्रीजला मोठा फटका बसला. आठवड्याच्या चौथ्या दिवशी हा शेअर ५२.७२ रुपयांच्या मागील बंद भावाच्या तुलनेत सुमारे ४ टक्क्यांनी घसरून ५० रुपयांच्या पातळीवर आला. हीच या शेअरची ५२ आठवड्यांतील नीचांकी पातळी ठरली आहे. यापूर्वी सप्टेंबर २०२५ मध्ये या शेअरने ७१.८० रुपयांचा उच्चांक गाठला होता.

१२ मार्च २०२६ पासून सांघी इंडस्ट्रीज लिमिटेडचा अंबुजा सिमेंट्स लिमिटेडमध्ये विलय अधिकृतपणे लागू झाला आहे. राष्ट्रीय कंपनी कायदा न्यायाधिकरणाच्या (NCLT) ९ फेब्रुवारी २०२६ च्या आदेशानंतर ही प्रक्रिया पूर्ण झाली असून, संबंधित कागदपत्रे १२ मार्च रोजी अहमदाबाद येथील कंपनी रजिस्ट्रारकडे सादर करण्यात आली. या विलयानंतर सांघी इंडस्ट्रीजचे स्वतंत्र अस्तित्व संपुष्टात आले असून, ती पूर्णपणे अंबुजा सिमेंट्समध्ये समाविष्ट झाली आहे.

या विलयासाठी ६ एप्रिल २०२६ ही रेकॉर्ड डेट निश्चित करण्यात आली आहे. ठरलेल्या स्वॅप रेशियोनुसार सांघी इंडस्ट्रीजच्या १० रुपयांच्या दर्शनी मूल्यासह १०० शेअर्सच्या बदल्यात अंबुजा सिमेंट्सचे २ रुपयांच्या दर्शनी मूल्यासह १२ इक्विटी शेअर्स दिले जाणार आहेत. यामुळे सांघी इंडस्ट्रीजचे भागधारक आता अंबुजा सिमेंट्सचे भागधारक बनतील.

उल्लेखनीय म्हणजे, अंबुजा सिमेंट्सने डिसेंबर २०२३ मध्ये सुमारे ५,१८५ कोटी रुपयांच्या व्यवहारातून सांघी इंडस्ट्रीजचे अधिग्रहण पूर्ण केले होते. त्यानंतर डिसेंबर २०२४ मध्ये या दोन्ही कंपन्यांच्या विलयास मंजुरी देण्यात आली होती. समान व्यवसाय क्षेत्रात कार्यरत असल्याने या विलयामुळे कामकाज अधिक कार्यक्षम व किफायतशीर होईल, असा कंपनीचा दावा आहे. अदानी समूहाच्या सिमेंट क्षेत्रात अंबुजा सिमेंट्ससह ACC लिमिटेडचाही समावेश असून, या विलयानंतर समूहाचा सिमेंट व्यवसाय अधिक मजबूत होण्याची अपेक्षा व्यक्त केली जात आहे.

(विशेष सूचना- कुठल्याही प्रकारची गुंतवणूक करण्यापूर्वी आर्थिक तज्ञाचा सल्ला घ्या.)