शेअर बाजाराची घसरणीसह सुरुवात; सेन्सेक्स ४५०, तर निफ्टी १६० अंकांनी घसरला, मेटल शेअर्समध्ये विक्री

Stock Markets Today: अर्थसंकल्पापूर्वी आज देशांतर्गत शेअर बाजाराचं शेवटचे ट्रेडिंग सत्र असून, बाजाराची सुरुवात मोठ्या घसरणीनं झाली आहे. सेन्सेक्स ४५० अंकांनी घसरून ८२,१०९ च्या आसपास, तर निफ्टी १६० अंकांनी घसरून २५,२५० वर उघडला. बँक निफ्टीमध्येही २२८ अंकांची घसरण पाहायला मिळाली. मिडकॅप आणि स्मॉलकॅप निर्देशांकात आज मोठी विक्री दिसून आली. मेटल इंडेक्स ३% पेक्षा जास्त, तर आयटी इंडेक्स १% नं घसरला आहे. बाजारातील अस्थिरता दर्शवणारा 'इंडिया व्हीआयएक्स' (India VIX) ३.५५% नं वाढलाय.

कोणते शेअर्स चर्चेत?

हिंदाल्को ५% घसरणीसह निफ्टीचा 'टॉप लूजर' ठरला. याशिवाय टाटा स्टील, जेएसडब्ल्यू स्टील, कोल इंडिया, एचसीएल टेक, इन्फोसिस आणि ओएनजीसीमध्ये मोठी घसरण झाली. दुसरीकडे, एफएमसीजी (FMCG) शेअर्सनी चांगली कामगिरी केली. नेस्ले इंडिया, मारुती सुझुकी, अपोलो हॉस्पिटल, आयटीसी, एशियन पेंट, एचयूएल, इंडिगो, टायटन आणि टाटा कन्झ्युमर हे आजचे 'टॉप गेनर्स' ठरलेत.

जागतिक बाजाराचे संकेत आणि रुपयाची स्थिती

मागील बंदच्या तुलनेत सेन्सेक्स ६१९ अंकांनी खाली ८१,९४७ वर उघडला, तर निफ्टी १७१ अंकांनी खाली २५,२४७ वर उघडला. दुसरीकडे, रुपया ४ पैशांनी वधारून ९१.९१/ डॉलर्स वर उघडला. आशियाई बाजारातील संकेतही कमकुवत आहेत. गिफ्ट निफ्टी (GIFT Nifty) सुमारे १४० अंकांनी घसरला असून निक्केईमध्येही मोठी घसरण झाली आहे. अमेरिकन बाजारातील चढ-उतार आणि एफआयआयची (FIIs) विक्री यांचा परिणाम आजच्या बाजारावर स्पष्टपणे जाणवत आहे.

कमोडिटी मार्केट आणि अमेरिकन बाजारातील अस्थिरता

कमोडिटी मार्केटमध्ये सोने-चांदी आणि कॉपरनं नवीन विक्रम प्रस्थापित केले आहेत, मात्र कच्च्या तेलाच्या किमतीत झालेल्या वाढीनं चिंता वाढवली आहे. अमेरिकन बाजारात जबरदस्त अस्थिरता पाहायला मिळाली; डाओ केवळ ५५ अंकांच्या किरकोळ वाढीसह बंद झाला. सलग सहा दिवसांच्या तेजीनंतर नॅस्डॅक (Nasdaq) १७० अंकांनी घसरला. या सर्व घडामोडींमुळे गेल्या तीन दिवसांपासून सुरू असलेल्या शेअर बाजारातील तेजीला आज ब्रेक लागण्याची शक्यता निर्माण झाली आहे.