सलग दहाव्या दिवशी आपटला Ola Electric चा शेअर; सीएफओंच्या राजीनाम्यानंतर आणखी वाईट स्थिती, पाहा डिटेल्स

Ola Electric Mobility Share Price: इलेक्ट्रिक दुचाकी बनवणारी कंपनी 'ओला इलेक्ट्रिक'च्या शेअर्समध्ये मंगळवारी, २० जानेवारी रोजी सलग १० व्या सत्रात घसरण पाहायला मिळाली. कंपनीचे मुख्य आर्थिक अधिकारी (CFO) हरीश अबिचंदानी यांच्या राजीनाम्यानंतर शेअरमध्ये आणखी ५ टक्क्यांची घसरण नोंदवली गेली आणि तो ३३.८२ रुपयांवर आला. या १० दिवसांच्या काळात शेअरमध्ये सुमारे २२ टक्क्यांची घट झाली आहे.

नवीन सीएफओंची नियुक्ती

ओलाने सोमवारी एका एक्सचेंज फाइलिंगमध्ये म्हटले आहे की, हरीश अबिचंदानी यांनी १९ जानेवारी २०२६ च्या संध्याकाळपासून कंपनीच्या सीएफओ पदाचा राजीनामा दिला आहे. अबिचंदानी यांनी आपल्या राजीनाम्यामागे वैयक्तिक कारणं सांगितली आहेत. तसंच, बोर्डाने दीपक रस्तोगी यांची सीएफओ म्हणून नियुक्ती मंजूर केली आहे, जे २० जानेवारी २०२६ पासून वरिष्ठ व्यवस्थापन टीमचा भाग असतील.

एनर्जी, अ‍ॅग्रीकल्चर, इन्व्हेस्टमेंट… २०० अब्ज डॉलर्सचं टार्गेट; भारत-युएईदरम्यान काय झाली ट्रेड डील?

रस्तोगी हे यापूर्वी 'पुरवंकरा' या प्रॉपर्टी डेव्हलपर कंपनीचे ग्रुप फायनान्स चीफ होते. याआधी डिसेंबरमध्ये, ओलाचे वरिष्ठ व्यवस्थापन कर्मचारी आणि बिझनेस हेड (सेल्स) विशाल चतुर्वेदी यांनीही वैयक्तिक कारणांमुळे राजीनामा दिला होता.

सलग चौथ्या महिन्यात शेअरमध्ये घसरण

या वर्षातील पहिल्या तीन ट्रेडिंग सत्रांचा अपवाद वगळता, ओला इलेक्ट्रिकचा शेअर जानेवारीच्या इतर सर्व सत्रांमध्ये घसरला आहे, ज्यामुळे ६ टक्क्यांची मासिक घसरण नोंदवली गेली आहे. या ईव्ही उत्पादक कंपनीसाठी हे सलग चौथं मासिक नुकसान आहे. २०२४ मध्ये शेअर बाजारात पदार्पण केल्यापासून हा शेअर बहुतांश काळ घसरणीच्या स्थितीत आहे.

डिसेंबरमधील विक्रीची आकडेवारी मजबूत

डिसेंबर महिन्यासाठी विक्रीची मजबूत आकडेवारी सादर केल्यानंतर, जानेवारीच्या सुरुवातीच्या सत्रात शेअरने ३० रुपयांच्या आपल्या 'ऑल-टाइम लो' पातळीवरून सुधारणा केली होती. ओलानं सांगितलं की, डिसेंबरमध्ये ९,०२० वाहनांच्या नोंदणीसह कंपनीनं आपला बाजार हिस्सा नोव्हेंबर २०२५ मधील ७.२ टक्क्यांच्या तुलनेत डिसेंबरमध्ये ९.३ टक्क्यांपर्यंत वाढवला आहे. शिवाय, डिसेंबर २०२५ च्या उत्तरार्धात कंपनीचा बाजार हिस्सा वाढून सुमारे १२ टक्के झाला होता, जो मागणीत स्पष्ट वाढ दर्शवतो.

शेअर या वर्षी आतापर्यंत ५५% खाली

परंतु, या वर्षी आतापर्यंत ओला इलेक्ट्रिकचे शेअर्स ५५ टक्क्यांनी खाली आहेत. १४६.३८ रुपयांच्या विक्रमी उच्चांकी पातळीवरून शेअरमध्ये ७७ टक्क्यांची घसरण झाली. ७६ रुपयांच्या आयपीओ (IPO) किमतीच्या तुलनेत सध्या हा शेअर निम्म्याहून अधिक घसरलाय. गेल्या वर्षी ऑगस्टमध्ये लिस्ट झाल्यापासून, या शेअरनं पाच पूर्ण तिमाहींपैकी चार तिमाहींमध्ये नकारात्मक परतावा दिलाय.

कंपनीनं अद्याप ३१ डिसेंबर रोजी संपलेल्या तिमाहीसाठी आपला शेअरहोल्डिंग पॅटर्न सार्वजनिक केलेला नाही. तसंच, डिसेंबर तिमाहीचे निकालही अद्याप जाहीर केलेले नाहीत.

प्रवर्तकांनी विकले ३०० कोटींचे शेअर्स

ओला इलेक्ट्रिक डिसेंबरमध्ये तेव्हा चर्चेत आली होती, जेव्हा तिचे प्रवर्तक भाविश अग्रवाल यांनी सुमारे ३०० कोटी रुपयांचे स्वतःचे काही शेअर्स विकले होते. कंपनीचं म्हणणं आहे की, हे पाऊल केवळ प्रवर्तक स्तरावरील सुमारे २६० कोटी रुपयांचं कर्ज पूर्णपणे फेडण्यासाठी आणि पूर्वी गहाण ठेवलेले सर्व ३.९३% शेअर्स मुक्त करण्यासाठी उचललं गेलं होतं. यामुळे आता कोणताही प्रवर्तक शेअर गहाण राहिलेला नाही.

(टीप - यामध्ये केवळ शेअरच्या कामगिरीची माहिती देण्यात आलेली आहे. हा गुंतवणूकीचा सल्ला नाही. कोणत्याही प्रकारची गुंतवणूक करण्यापूर्वी या क्षेत्रातील जाणकार किंवा तज्ज्ञांचा सल्ला घेणं आवश्यक आहे.)