170 अब्ज डॉलर्सचे व्हॅल्युएशन, 38000 कोटी उभारण्याची तयारी; कधी येणार Jio IPO?

जिओ IPO बाबत एक महत्वाची अपडेट समोर आली आहे.

Jio IPO:रिलायन्स समूहाची टेलिकॉम कंपनी Jio च्या IPO बाबत एक मोठी माहिती समोर आली आहे. ब्लूमबर्ग न्यूजने सूत्रांच्या हवाल्याने दिलेल्या माहितीनुसार, रिलायन्सने जिओच्या लिस्टिंगसाठी ड्राफ्ट प्रॉस्पेक्टस तयार करण्याची प्रक्रिया अनौपचारिक पातळीवर सुरू केली आहे. कंपनी या संदर्भात विविध बँकांसोबत चर्चा करत असून, हे ड्राफ्ट लवकरात लवकर SEBI कडे दाखल केले जातील.

5 ट्रिलियनच्या नियमांनंतर औपचारिक प्रक्रिया सुरू होणार

मीडिया रिपोर्ट्सनुसार, SEBI ने अलीकडेच 5 ट्रिलियन रुपये (55 अब्ज डॉलर) पेक्षा जास्त पोस्ट-इश्यू मार्केट कॅप असलेल्या कंपन्यांसाठी IPO मधील किमान शेअर डायल्यूशन 2.5% पर्यंत कमी करण्यास मंजुरी दिली आहे. तथापि, हे नवीन नियम अजून लागू झालेले नाहीत.

नियम लागू झाल्यानंतरच, ड्राफ्ट प्रॉस्पेक्टस दाखल करणे आणि बँकर्सची औपचारिक नियुक्तीची प्रक्रिया पुढे नेली जाईल.

जिओचे संभाव्य व्हॅल्युएशन 170 अब्ज डॉलर्स

बँकर्सने जिओसाठी 170 अब्ज डॉलर पर्यंतच्या व्हॅल्युएशनचा अंदाज वर्तवला आहे. हे प्रतिस्पर्धी भारती एयरटेलपेक्षा (140 अब्ज डॉलर) अधिक आहे.

नवीन लिस्टिंग नियमांतर्गत, जर जिओला या व्हॅल्युएशनचा उच्चांक प्राप्त झाला आणि किमान डायल्यूशनचा पर्याय निवडला, तर कंपनी सुमारे 4.3 अब्ज डॉलर (38,000 कोटी रुपयांपेक्षा अधिक) भांडवल उभारू शकते.

IPO 2026 च्या पहिल्या सहामाहीत येणार?

ऑगस्ट 2024 मध्ये रिलायन्स इंडस्ट्रीजचे चेअरमन मुकेश अंबानी यांनी संकेत दिले होते की, जिओची लिस्टिंग 2026 च्या पहिल्या सहामाहीत होऊ शकते.

रिलायन्स इंडस्ट्रीज हा अत्यंत डायव्हर्सिफाइड समूह असून, जिओ आणि रिलायन्स रिटेल त्याच्या महत्त्वाच्या सबसिडरी आहेत. रिलायन्स आपल्या टेलिकॉम व्यवसायाचे डीमर्जर करण्याच्या तयारीत आहे. दरम्यान, जिओ IPO नंतरच रिलायन्स रिटेलचा IPO ही बाजारात येऊ शकतो, अशी चर्चा आहे.

भारतातील सर्वात मोठ्या IPO पैकी एक?

जिओ IPO आला, तर तो भारतीय बाजारातील सर्वात मोठ्या IPO पैकी एक ठरेल. जिओच्या यशस्वी व्यवसाय मॉडेल, 5G विस्तार आणि मोठ्या ग्राहकआधारामुळे या लिस्टिंगकडे गुंतवणूक जगताचे लक्ष लागले आहे.

(टीप-शेअर बाजारात गुंतवणूक करण्यापूर्वी आर्थिक सल्लागाराची मदत घ्या.)