Digital Gold : गेल्या काही वर्षांत डिजिटल गोल्डमध्ये गुंतवणूक करणे हा एक सोपा आणि लोकप्रिय पर्याय बनला आहे. फोनपे, पेटीएम, आणि गूगल पे सारख्या लोकप्रिय ॲप्समुळे आता फक्त १० ते १०० रुपयांमध्येही सोने खरेदी करणे शक्य झाले आहे. हे प्लॅटफॉर्म MMTC-PAMP आणि Augmont सारख्या कंपन्यांच्या भागीदारीत ही सुविधा देत आहेत. डिजिटल गोल्ड लोकप्रिय होण्यामागे दोन मुख्य कारणे आहेत. एक म्हणजे गुंतवणुकीची सुलभता आणि दुसरे म्हणजे घरी बसून सुरक्षितपणे सोने ठेवण्याची चिंता नसणे. मात्र, यात मोठे धोके देखील आहेत आणि जर तुम्ही काही नियमांकडे दुर्लक्ष केले, तर तुमचे पैसे अडकू शकतात.
सेबीचा महत्त्वाचा इशारामार्केट रेग्युलेटर सेबीने स्पष्टपणे सांगितले आहे की, पेटीएम, गूगल पे किंवा फोन पे सारख्या ऑनलाइन प्लॅटफॉर्मवर डिजिटल गोल्ड खरेदी केले जाऊ शकते. परंतु डिजिटल गोल्ड कोणत्याही नियमांतर्गत नाही. डिजिटल गोल्ड 'सुरक्षित' नसते आणि ते कमोडिटी डेरिव्हेटिव्ह देखील नसते. सेबीने गुंतवणूकदारांना धोक्याचा इशारा दिला आहे की, जर तुम्ही वापरलेला प्लॅटफॉर्म डिफॉल्ट झाला, तर सेबी तुमची मदत करू शकणार नाही आणि तुमचे पैसे अडकू शकतात.
गुंतवणूक करताना 'हे' लक्षात ठेवाडिजिटल गोल्ड अनेक ऑनलाइन ॲप्सवर उपलब्ध आहे, पण तुम्ही प्रत्येक प्लॅटफॉर्मवर विश्वास ठेवण्यासाठी तपासणी करा. काही प्लॅटफॉर्म केवळ मध्यस्थाचे काम करतात आणि त्यांच्याकडे गोल्ड स्टॉक नसतो. जर अशा कंपनीचा सर्व्हर डाउन झाला किंवा ती कंपनी अडचणीत आली, तर तुमचा पैसा बुडू शकतो. नेहमी Augmont, MMTC-PAMP किंवा SafeGold सारख्या नामांकित आणि विश्वासार्ह कंपन्यांवरच विश्वास ठेवा. तसेच, ती कंपनी रिझर्व्ह बँक ऑफ इंडिया किंवा सेबीकडून अप्रूव्हड आहे की नाही, हे तपासा.
वेळेची मर्यादा आणि चार्जअनेक गुंतवणूकदार डिजिटल गोल्ड दीर्घकाळासाठी ठेवतात, पण त्यांना याची मर्यादा माहीत नसते. काही प्लॅटफॉर्म तुम्हाला फक्त ५ वर्षांपर्यंतच सोने स्टोअर करण्याची परवानगी देतात. त्यानंतर तुम्हाला त्याची फिजिकल डिलिव्हरी घ्यावी लागते किंवा ते विकावे लागते. फिजिकल डिलिव्हरी घेतल्यास, त्यावर मेकिंग चार्ज, डिलिव्हरी चार्ज आणि ट्रान्सपोर्टेशनचा खर्च लागतो, ज्यामुळे तुमचा एकूण परतावा कमी होतो.
वाचा - सरकारी गॅरंटीसह दुप्पट फायदा! पोस्ट ऑफिसच्या 'या' FD स्कीममध्ये पैसे गुंतवल्यास मिळेल बंपर रिटर्न!
उत्तम पर्याय कोणते?जर तुम्ही दीर्घकालीन गुंतवणुकीचा विचार करत असाल आणि सरकारी सुरक्षा तसेच व्याजाचा फायदा घेऊ इच्छित असाल, तर तुम्ही गोल्ड ईटीएफ किंवा सॉवरेन गोल्ड बाँड्स या पर्यायांचा विचार करू शकता. यावर सरकारी सुरक्षा मिळते आणि SGB मध्ये अतिरिक्त व्याजही मिळते.