५ लाख रुपयांचे मिळतील १० लाख! पोस्ट ऑफिसची 'ही' सरकारी योजना १००% सुरक्षित, काय आहेत फायदे?

KVP Scheme : तुम्हाला मुद्दल सुरक्षित ठेवून पैसे दुप्पट करण्याची इच्छा असेल तर ही योजना तुमच्यासाठी बेस्ट आहे.

KVP Scheme : जर तुम्हाला तुमची कष्टाची कमाई सुरक्षित ठेवायची असेल आणि ती हळूहळू दुप्पट व्हावी अशी तुमची इच्छा असेल, तर पोस्ट ऑफिसची किसान विकास पत्र योजना तुमच्यासाठी एक सर्वोत्तम पर्याय आहे. ही योजना केंद्र सरकार चालवते, त्यामुळे यात गुंतवलेले पैसे १००% सुरक्षित राहतात.

किसान विकास पत्र ही एक 'फिक्स्ड इन्कम स्कीम' आहे. यात गुंतवणूकदार एका निश्चित कालावधीसाठी पैसे गुंतवतात आणि मुदत पूर्ण झाल्यावर गुंतवलेली रक्कम दुप्पट होऊन परत मिळते. हे प्रमाणपत्र पोस्ट ऑफिसद्वारे व्यवस्थापित केले जाते.

फक्त ११५ महिन्यांत पैसा दुप्पटसध्या किसान विकास पत्रवर ७.५% वार्षिक दराने व्याज मिळत आहे. या दरानुसार, तुमचे पैसे ११५ महिने म्हणजे सुमारे ९ वर्षे ७ महिन्यांत दुप्पट होतात. जर तुम्ही केवीपी योजनेत ५ लाख रुपये गुंतवले, तर ९ वर्षे ७ महिन्यांनंतर तुम्हाला १० लाख रुपये मिळतील.

गुंतवणुकीची मर्यादा आणि खाते उघडण्याची सोयतुम्ही कमीत कमी १,००० रुपयांपासून गुंतवणूक सुरू करू शकता. जास्तीत जास्त पैसे गुंतवण्यावर कोणतीही मर्यादा नाही, तुम्ही कितीही रक्कम गुंतवू शकता. या योजनेत एकल किंवा संयुक्त स्वरूपात खाते उघडता येते. पालक अल्पवयीन मुलाच्या नावाने देखील हे खाते उघडू शकतात.

किसान विकास पत्राचे इतर महत्त्वाचे फायदे

• या योजनेत केंद्र सरकारची १००% हमी असल्याने, तुमचे पैसे पूर्णपणे सुरक्षित असतात.
• गरज पडल्यास, तुम्ही KVP च्या बदल्यात बँकेकडून कर्ज देखील घेऊ शकता.
• हे खाते देशातील कोणत्याही पोस्ट ऑफिसमध्ये हस्तांतरित (ट्रान्सफर) करण्याची सुविधा उपलब्ध आहे.
• तुम्ही या खात्यासाठी कोणालाही नॉमिनी बनवू शकता.

वाचा - गुंतवणूकदारांना बंपर भेट! 'ही' आयटी कंपनी देणार प्रति शेअर १३० रुपये लाभांश; रेकॉर्ड डेट कधी? लगेच तपासा

पैसे काढण्याचे नियम

• हे एक दीर्घ मुदतीचे गुंतवणुकीचे साधन असले तरी, २ वर्षे ६ महिने पूर्ण झाल्यानंतर काही विशिष्ट अटींवर तुम्हाला पैसे काढण्याची सुविधा उपलब्ध आहे.
• या योजनेत मिळणारे व्याज हे टॅक्सेबल असते, म्हणजेच प्राप्तिकर नियमांनुसार त्यावर कर भरावा लागतो. त्यामुळे गुंतवणूक करण्यापूर्वी तुमचा टॅक्स प्लॅनिंग अवश्य तपासा.
• जोखीम न घेता, सुरक्षित आणि हमी असलेला परतावा हवा असलेल्या लोकांसाठी किसान विकास पत्र ही योजना एक उत्कृष्ट पर्याय आहे. एकदा गुंतवणूक करा आणि ११५ महिन्यांत तुमचे पैसे दुप्पट मिळवा.