Share Market Holiday: मंगळवारी शेअर बाजारात ट्रेडिंग होणार नाही; कामकाज राहणार बंद, पाहा काय आहे यामागचं कारण?

Share Market Holiday: जर तुम्ही भारतीय शेअर बाजारात ट्रेडिंग करत असाल, तर ही बातमी तुमच्यासाठी महत्त्वाची आहे. पुढील आठवड्यात सुट्ट्यांमुळे शेअर बाजारात फक्त ४ दिवस ट्रेडिंग होईल. मिळालेल्या माहितीनुसार, मंगळवार, १४ एप्रिल रोजी भारतरत्न डॉ. बाबासाहेब आंबेडकर जयंतीनिमित्त एनएसई (NSE) आणि बीएसई (BSE) हे दोन्ही स्टॉक एक्सचेंज बंद राहतील. यामुळे सोमवार, बुधवार, गुरुवार आणि शुक्रवार असे चार दिवस कामकाज चालेल. शनिवार आणि रविवार हे साप्ताहिक सुट्टीचे दिवस असतात.

याव्यतिरिक्त, भारताचं सर्वात मोठं कमोडिटी एक्सचेंज, 'मल्टी-कमोडिटी एक्सचेंज ऑफ इंडिया' (MCX) डॉ. बाबासाहेब आंबेडकर जयंतीनिमित्त सकाळच्या सत्रात बंद राहील. मात्र, संध्याकाळच्या सत्रात ट्रेडिंग पुन्हा सुरू होईल.

आता तुमच्या सुट्ट्या वाया जाणार नाहीत! उरलेल्या सुट्ट्यांच्या मोबदल्यात मिळणार पैसा; नव्या कामगार कायद्यात काय?

२०२६ मधील सुट्ट्यांचे वेळापत्रक

गेल्या आठवड्यात देखील भारतीय शेअर बाजार गुड फ्रायडे आणि महावीर जयंतीनिमित्त दोन दिवस बंद होता. २०२६ मध्ये शेअर बाजारासाठी एकूण १६ सुट्ट्या निश्चित करण्यात आल्या आहेत, ज्यापैकी ६ सुट्ट्या आधीच झाल्या आहेत. पुढील आठवड्याच्या सुट्टीनंतर, उर्वरित नऊ महिन्यांत आणखी ९ प्रसंगी ट्रेडिंग बंद राहील. १४ एप्रिलनंतर बाजाराची पुढची सुट्टी १ मे रोजी 'महाराष्ट्र दिन' आणि २८ मे रोजी 'बकरी ईद' निमित्त असेल.

वर्षाच्या उत्तरार्धात २६ जून रोजी मोहरम, १४ सप्टेंबर रोजी गणेश चतुर्थी आणि २ ऑक्टोबर रोजी गांधी जयंतीनिमित्त कामकाज बंद राहील. त्यानंतर २० ऑक्टोबरला दसरा, १० नोव्हेंबरला दिवाळी बलिप्रतिपदा आणि २४ नोव्हेंबरला गुरुनानक जयंतीची सुट्टी असेल. २०२६ मधील शेअर बाजाराची शेवटची सुट्टी २५ डिसेंबर रोजी नाताळनिमित्त असेल. विशेष म्हणजे, २०२६ मध्ये महाशिवरात्री (१५ फेब्रुवारी), ईद-उल-फितर (२१ मार्च), स्वातंत्र्य दिन (१५ ऑगस्ट) आणि दिवाळी लक्ष्मीपूजन (८ नोव्हेंबर) या चार मोठ्या सुट्ट्या शनिवार-रविवार (वीकेंड) येत आहेत.