LPG Price Today: पाकिस्तानात घरगुती सिलेंडरची किंमत ४५०० रुपयांवर; १७००० पर्यंत गेले कमर्शिअल सिलेंडरचे दर

LPG Price Today in Pakistan: इराण-इस्रायल युद्धाच्या झळा जवळजवळ सर्वच देशांना बसत आहेत. जगभरात पेट्रोल-डिझेल आणि गॅसच्या किमती वाढत असताना, भारतामध्ये एलपीजीच्या घरगुती आणि व्यावसायिक ग्राहकांना सध्या दिलासा आहे. याउलट, पाकिस्तानात एलपीजीच्या किमती सर्वसामान्यांसाठी मोठी डोकेदुखी ठरत आहेत. सरकारी दर आणि बाजारातील प्रत्यक्ष किमती यांमधील मोठ्या फरकामुळे ग्राहकांच्या खिशावर अतिरिक्त बोजा पडत आहे.

पाकिस्तानातील एलपीजीचे दर

पाकिस्तानातील सरकारी नियामक संस्था 'ऑईल अँड गॅस रेग्युलेटरी अथॉरिटी' (OGRA) नुसार, एलपीजीची किंमत २२५.८४ पाकिस्तानी रुपये प्रति किलो आहे. त्यानुसार ११.८ किलोच्या घरगुती सिलिंडरची किंमत २,६६४ पाकिस्तानी रुपये आहे. मात्र, lpgpriceinpakistan.com नुसार बाजारातील स्थिती वेगळी आहे. किरकोळ बाजारात एलपीजी ३०० ते ४०० पाकिस्तानी रुपये प्रति किलोनं मिळत आहे. तर घरगुती सिलिंडर ३,५०० ते ४,५५० पाकिस्तानी रुपये आणि व्यावसायिक सिलिंडर १३,६०० ते १७,००० पाकिस्तानी रुपये (सरकारी दर १०,२५३ रुपये असताना) इतका झालाय.

रशियाची ४०% कच्च्या तेलाची निर्यात ठप्प; आता युक्रेनच्या हल्ल्यानं जगात हाहाकार माजणार, भारतावर काय परिणाम?

भारतातील एलपीजीचे दर

नवी दिल्ली: घरगुती ₹९१३ | व्यावसायिक ₹१,८८४.५०चेन्नई: घरगुती ₹९२८.५० | व्यावसायिक ₹२,०४३.५०हैदराबाद: घरगुती ₹९६५ | व्यावसायिक ₹२,१०५.५०मुंबई: घरगुती ₹९१२.५० | व्यावसायिक ₹१,८३६

भारत विरुद्ध पाकिस्तान: कुठे स्वस्त?

भारतीय मानकानुसार १४.२ किलो सिलिंडरचा विचार केल्यास, पाकिस्तानात त्याची किंमत ४,२६० ते ५,६८० पाकिस्तानी रुपये होते. सध्याच्या विनिमय दरानुसार (१ पाकिस्तानी रुपया = ₹०.३०) ही किंमत भारतीय चलनानुसार सुमारे ₹१,२७८ ते ₹१,७०४ पडते. भारतात हाच सिलिंडर ₹९०० ते ₹९५० च्या दरम्यान उपलब्ध आहे. या तुलनेवरून स्पष्ट होते की, पाकिस्तानात एलपीजी भारताच्या तुलनेत ३०% ते ८०% महाग आहे. आयातीवर अति-अवलंबित्व, कमकुवत चलन आणि पुरवठा साखळीतील अडथळे ही पाकिस्तानातील दरवाढीची प्रमुख कारणं आहेत.