दहा दिवसांत कलिंगडाचे दर गडगडले, ठोक बाजारात प्रतिकिलो काय दर मिळतोय? 

Watermelon Rate :

जळगाव : रमजान महिन्याच्या सुरुवातीला कलिंगडाला ठोक बाजारात २० ते २५ रुपये प्रतिकिलो असा चांगला दर मिळत होता. मात्र, अवघ्या दहा दिवसांतच हा दर कोसळून किलोमागे ७ ते १० रुपयांपर्यंत खाली दर आले आहेत. अचानक झालेल्या या दरघटीमुळे तालुक्यातील कलिंगड उत्पादक शेतकरी आर्थिक संकटात सापडले आहेत.

यंदा उन्हाळ्याची तीव्रता आणि रमजानच्या पार्श्वभूमीवर कलिंगडाला मोठी मागणी राहील, असा अंदाज शेतकऱ्यांचा होता. अनेकांनी मल्चिंग पेपर, ठिबक सिंचन यांसारख्या आधुनिक तंत्रज्ञानाचा वापर करून मोठ्या प्रमाणात लागवड केली. सुरुवातीच्या काळात चांगला दर मिळाल्याने शेतकऱ्यांना दोन ते तीन लाख रुपयांपर्यंत उत्पन्नाची अपेक्षा होती. 

बाजारात आवक वाढल्याने आणि मागणी घटल्याने भावात घसरण झाली. कलिंगड पिकासाठी एकरी साधारण ५० ते ६० हजार रुपयांपर्यंत खर्च येतो. सुधारित बियाणे, खते, कीटकनाशके तसेच मजुरी यावर मोठा खर्च करावा लागतो.

आम्ही तीन एकर क्षेत्रात कलिंगडाची लागवड केली होती. सुरुवातीला बाजारात सुमारे २३ रुपये प्रतिकिलो दर मिळत असल्याने खर्च व कर्ज निघेल, अशी अपेक्षा होती. मात्र, आता बाजारात कलिंगड येताच केवळ ७ ते ८ रुपये प्रतिकिलो दर मिळत असल्याने मोठे नुकसान होत आहे. सध्या मिळत असलेल्या १० रुपयांच्या दरात खर्चही निघणे कठीण झाले आहे.- बाबूराव नथ्थू कोळी, शेतकरी, तळेगाव ता. जामनेर

वाचा आजचे बाजारभाव 

बाजार समिती	जात/प्रत	परिमाण	आवक	कमीत कमी दर	जास्तीत जास्त दर	सर्वसाधारण दर
10/03/2026
मुंबई - फ्रुट मार्केट	---	क्विंटल	9615	1800	2200	2000
खेड-चाकण	---	क्विंटल	505	1200	1700	1400
सोलापूर	लोकल	क्विंटल	695	500	2200	1200
सांगली -फळे भाजीपाला	लोकल	क्विंटल	660	800	2000	1400
पुणे	लोकल	क्विंटल	3123	1000	2000	1500
पुणे-मोशी	लोकल	क्विंटल	945	1200	1500	1350
भुसावळ	लोकल	क्विंटल	6	1000	1500	1500