एक्स्प्रेसमध्ये खाद्यपदार्थ विकणाऱ्यांना 'युनिफॉर्म'; प्रवाशांच्या लुबाडणुकीला लगाम बसणार

'वंदे भारत' व 'राजधानी' यांसारख्या प्रीमियम गाड्यांमध्ये कर्मचाऱ्यांना 'नेव्ही ब्लू' या रंगाच्या जॅकेटवर हेल्पलाइन क्रमांकासह युनिफॉर्म देण्यात येणार आहेत.

मुंबई - खाद्यपदार्थ खरेदी करताना रेल्वे प्रवाशांच्या होणाऱ्या लुबाडणुकीला आता लगाम बसणार आहे. रेल्वेच्या मेल, एक्स्प्रेसमध्ये खाद्यपदार्थांची अधिकृत विक्री करणारे ओळखण्यासाठी इंडियन रेल्वे केटरिंग अँड टुरिझम कॉर्पोरेशनने (आयआरसीटीसी) त्यांच्यासाठी युनिफॉर्म निश्चित केला असून दरपत्रकाचे क्यूआर कोड आणि हेल्पलाइन क्रमांक जारी केला असल्याने हा बदल घडणार आहे. प्रवाशांकडून मूळ किमतीपेक्षा जास्त पैसे घेण्याच्या तक्रारी वाढल्याने हा निर्णय घेतल्याचे अधिकाऱ्यांनी सांगितले.

'वंदे भारत' व 'राजधानी' यांसारख्या प्रीमियम गाड्यांमध्ये कर्मचाऱ्यांना 'नेव्ही ब्लू' या रंगाच्या जॅकेटवर हेल्पलाइन क्रमांकासह युनिफॉर्म देण्यात येणार आहेत. इतर गाड्यांमध्ये कर्मचाऱ्यांना हलक्या निळ्या रंगाचे टी-शर्ट देण्यात येतील. त्यांना क्यूआर कोड असलेली ओळखपत्रेही अनिवार्य करण्यात आली आहेत. क्यूआर कोड स्कॅन केल्यावर मेन्यू व अधिकृत दरांची माहिती मिळेल, तसेच तक्रारींसाठी खास हेल्पलाइन क्रमांक उपलब्ध असेल. नवीन प्रणाली ख्रिसमस व नववर्षाच्या सुट्ट्यांपासून सुरू होणार आहे. 

अधिक पैसे घेतल्याच्या तक्रारी वाढल्यापश्चिम रेल्वे झोनमध्ये दररोज १ १०० ते १२० तक्रारी येतात. त्यापैकी ३५ ते ४० टक्के तक्रारी जादा पैसे आकारण्याबाबत असतात. उत्तर प्रदेश व बिहारकडे जाणाऱ्या गाड्यांमध्ये अनधिकृत विक्रेत्यांकडून खाद्यपदार्थ विक्री व जादा आकारणीच्या तक्रारी सर्वाधिक येतात. नव्या प्रणालीमुळे कंत्राटदार आणि जादा आकारणी करणाऱ्या कर्मचाऱ्यांची अचूक ओळख पटवणे सोपे होणार असल्याचे अधिकाऱ्यांनी स्पष्ट केले.

या प्रणालीचा वापर सुरुवातीला मुंबईमधून सुटणाऱ्या ट्रेनमध्ये केला जाईल. क्यूआर कोडच्या एका बाजूला मेन्यू व अधिकृत दरपत्रक, तर दुसऱ्या बाजूला डिजिटल पेमेंटची सुविधा असेल. यामुळे रोख व्यवहार कमी होऊन अनावश्यक वाद व जादा आकारणीची शक्यता घटेल, असे अधिकारी म्हणाले. त्यामुळे ट्रेनमध्ये विक्री करताना युनिफॉर्म आणि क्यूआर कोड असलेले ओळखपत्र अधिकृत विक्रेत्यांना सोबत ठेवणे आवश्यक असेल.