आचारसंहिता संपताच निविदांचा पडला पाऊस; महिनाभरात ६०० कोटींच्या ३६१ निविदा प्रसिद्ध

या निविदांच्या माध्यमातून मुंबईतील विविध नागरी आणि पायाभूत सुविधांची कामे केली जाणार आहेत, अशी माहिती एका वरिष्ठ अधिकाऱ्याने दिली.

मुंबई - स्थानिक स्वराज्य संस्थांच्या निवडणुकांची आचारसंहिता संपताच पालिकेने निविदांचा धडाका लावला आहे. गेल्या महिनाभरात पालिकेने सुमारे ६०० कोटी रुपये खर्चाच्या ३६१ निविदा काढल्या असून, त्यांपैकी ३५५ निविदा सध्या प्रत्यक्ष प्रक्रियेत आहेत.

निवडणूक आयोगाच्या आचारसंहितेमुळे १५ डिसेंबर ते १६ जानेवारी या काळात पालिका प्रशासनाला एकही नवीन निविदा काढता आली नव्हती. साधारणपणे पालिकेत दर आठवड्याला ५ ते १० निविदा निघतात. मात्र, आचारसंहितेमुळे कामांचा मोठा डोंगर साचला होता. हा विलंब टाळण्यासाठी १७ जानेवारी ते ९ फेब्रुवारी या अल्प कालावधीत ३६१ निविदांचा पाऊस पाडण्यात आला. या निविदांच्या माध्यमातून मुंबईतील विविध नागरी आणि पायाभूत सुविधांची कामे केली जाणार आहेत, अशी माहिती एका वरिष्ठ अधिकाऱ्याने दिली. ७ मार्च २०२२ रोजी पालिकेतील लोकप्रतिनिधींचा कार्यकाळ संपल्यापासून पालिकेचा कारभार प्रशासकांमार्फत चालवला जात होता. महापौर रितू तावडे यांनी नुकताच पदाचा कार्यभार हाती घेतला आहे. 

ही होणार कामे...
रस्ते आणि सांडपाणी : पूर्व उपनगरातील रस्त्यांची कामे आणि वांद्रे येथील सांडपाणी प्रक्रिया केंद्राची दुरुस्ती.
आरोग्य आणि शिक्षण : पालिकेच्या केईएम रुग्णालयातील दुरुस्तीची कामे करण्यात येणार आहे.
स्वच्छता आणि प्रदूषण : बोरिवलीत कचरा संकलनासाठी वाहने भाड्याने घेणे, मालाडमध्ये ड्रेनेज दुरुस्ती आणि वायुप्रदूषण रोखण्यासाठी ‘मिस्ट स्प्रे’ मशीनची खरेदी करणे.