संजय पांडे करणार परमबीर सिंग यांची चाैकशी

सचिन वाझे प्रकरण; राज्य सरकारचा मोठा निर्णय

लोकमत न्यूज नेटवर्क

मुंबई : मुंबईचे माजी पोलीस आयुक्त परमबीर सिंग यांच्या विरुद्धची प्राथमिक चौकशी नूतन पोलीस महासंचालक संजय पांडे करणार आहेत. मुंबई पोलीस आयुक्तांनी त्यांच्याबाबत दिलेल्या अहवालानंतर राज्य सरकारने त्यांच्यावर ही जबाबदारी सोपविली आहे.

एनआयएच्या ताब्यात असलेल्या निलंबित पाेलीस अधिकारी सचिन वाझे प्रकरणामुळे आयुक्तपदावरून उचलबांगडी झाल्यानंतर परमबीर सिंग यांनी, माजी गृहमंत्री अनिल देशमुख यांनी वाझेला दर महिना १०० कोटी वसुली करण्याचे टार्गेट दिले होते, असा ‘लेटरबॉम्ब’ टाकून राज्य सरकारला अडचणीत आणले. या आरोपाची सीबीआयला चौकशी करण्याचे आदेश उच्च न्यायालयाने दिल्यानंतर अनिल देशमुख यांनी मंत्रिपदाचा राजीनामा दिला.

दरम्यान, मुंबईचे आयुक्त हेमंत नगराळे यांनी वाझेचे पाेलीस सेवेत ‘पुनर्वसन’ करण्यापासून त्याची मुंबई गुन्हे शाखेच्या गुन्हेगारी गुप्तवार्ता विभागातील (सीआययू) नियुक्ती आणि सर्व महत्त्वाच्या तपास त्याच्याकडे देण्यामागे तत्कालीन आयुक्त परमबीर सिंग हेच कारणीभूत होते, असा ठपका त्यांच्यावर ठेवला आहे. विविध आठ मुद्द्यांवरील या अहवालावर प्राथमिक चौकशी करून पुढील कार्यवाही केली जाणार आहे. सरकारने ही चौकशी पोलीस महासंचालक पदाचा अतिरिक्त कार्यभार दिलेल्या पांडे यांच्याकडे साेपविली आहे. त्यांच्या अहवालानंतर राज्य सरकार त्याबद्दल पुढील कार्यवाही करेल, असे गृह विभागातील सूत्रांनी सांगितले.

............................