झिपर स्टॉपर गिळलेल्या १० महिन्याच्या चिमुकल्याला वाचवण्यात मुंबईतील वाडिया रुग्णालयाला मोठे यश आले. या बाळाला दोन आठवड्यांपूर्वी हँडबॅग झिपर स्टॉपर गिळली होती. बाळाला जेवताना खोकला येत असल्याने त्याला रुग्णालयात नेण्यात आले. त्यानंतर हा धक्कादायक प्रकार उघड झाला.
मिळालेल्या माहितीनुसार, मुंबईतील एका दाम्पत्याने त्यांच्या १० महिन्याच्या बाळाला जेवताना खोकला आणि चिडचिड होत असल्याने त्यांनी बाळाला बालरोगतज्ञांकडे नेले. बाळावर दोन आठवडे उपचार केल्यानंतरही त्याला त्रास जाणवत होता. त्यामुळे पालकांनी त्याला पुन्हा डॉक्टरांकडे नेले. डॉक्टरांनी त्यांना एक्स-रे काढायला सांगितले. त्यावेळी बाळाच्या अन्ननलिकेत एक धातूची वस्तू अडकली, असे समजले. त्यामुळे बाळाला जेवताना त्रास जाणवत होता, असे वैद्यकीय अहवालातून स्पष्ट झाले. या बाळावर मुंबईतील चिल्ड्रेन स्पेशालिस्ट वाडिया रुग्णालयात यशस्वी उपचार करण्यात आले. सध्या बाळाची प्रकृती स्थिर आहे, अशीही माहिती आहे.