मुंबई महापालिकेला मिळणार पहिली महिला आयुक्त! आयुक्तपदी अश्विनी भिडेंचे नाव निश्चित

विद्यमान आयुक्त भूषण गगराणी यांचा कार्यकाळ ३१ मार्च २०२६ रोजी संपत असल्याने, त्यानंतर ही मोठी जबाबदारी भिडे यांच्याकडे सोपवली जाऊ शकते.

देशातील सर्वात श्रीमंत महापालिका म्हणून ओळखल्या जाणाऱ्या मुंबई महानगरपालिकेला आता पहिली महिला आयुक्त मिळण्याची शक्यता आहे. १९९५ बॅचच्या अनुभवी आयएएस अधिकारी अश्विनी भिडे यांची या रिक्त होणाऱ्या पदावर वर्णी लागण्याची चर्चा सध्या मंत्रालयात रंगली आहे. विद्यमान आयुक्त भूषण गगराणी यांचा कार्यकाळ ३१ मार्च २०२६ रोजी संपत असल्याने, त्यानंतर ही मोठी जबाबदारी भिडे यांच्याकडे सोपवली जाऊ शकते.

जागतिक अर्थव्यवस्थेला 'इराण युद्धाचा' विळखा! मंदीचं सावट आणि महागाईचा भडका; IMF ने धोक्याची घंटा वाजवली

अश्विनी भिडे सध्या मुख्यमंत्री कार्यालयात अतिरिक्त मुख्य सचिव म्हणून कार्यरत आहेत. यापूर्वी त्यांनी मुंबई मेट्रो रेल कॉर्पोरेशनच्या व्यवस्थापकीय संचालक म्हणून अत्यंत आव्हानात्मक पायाभूत प्रकल्प यशस्वीपणे हाताळले आहेत. त्यांच्या कामाची शिस्त आणि तांत्रिक बाबींवरील पकड यामुळेच त्यांचे नाव आघाडीवर आहे.

आयुक्त पदासाठी संजय मुखर्जी आणि असीम गुप्ता यांच्या नावांचीही चर्चा सुरू होती. मात्र, मुंबईतील पायाभूत सुविधा आणि प्रशासकीय गुंतागुंत हाताळण्याचा अश्विनी भिडे यांचा अनुभव पाहता, सरकारने त्यांच्या नावावर शिक्कामोर्तब केल्याचे समजते. जर त्यांची निवड झाली, तर त्या २०३० पर्यंत या पदाचा पूर्ण कार्यकाळ पूर्ण करतील, अशी अपेक्षा आहे.

मुंबईतील रस्ते, कोस्टल रोड आणि सांडपाणी व्यवस्थापन यांसारखे महत्त्वाचे प्रकल्प सध्या प्रगतीपथावर आहेत. अशा वेळी अश्विनी भिडे यांची नियुक्ती मुंबईच्या पायाभूत विकासासाठी अत्यंत महत्त्वाची मानली जात आहे. बीएमसीच्या इतिहासात पहिल्यांदाच एका महिलेच्या हाती मुंबईचा कारभार येणार असल्याने या निवडीकडे सर्वांचे लक्ष लागले आहे.