तिन्ही मार्गावर मुंबईत उद्या ‘मेगा ब्लॉक डे’; पश्चिम, मध्य, हार्बरवरील वेळापत्रक कसे असेल?

मध्य रेल्वे, हार्बर रेल्वे आणि पश्चिम रेल्वे मार्गावर विविध अभियांत्रिकी आणि देखभालीची कामे करण्यासाठी रविवारी मेगा ब्लॉक घेण्यात येणार आहे.

लोकमत न्यूज नेटवर्क, मुंबई: मध्य रेल्वे, हार्बर रेल्वे आणि पश्चिम रेल्वे मार्गावर विविध अभियांत्रिकी आणि देखभालीची कामे करण्यासाठी रविवारी मेगा ब्लॉक घेण्यात येणार आहे.

यामध्ये मध्य रेल्वेच्या ठाणे- कल्याणदरम्यान अप आणि डाऊन जलद मार्गावर सकाळी १०:४० ते दुपारी ०३:४० पर्यंत ब्लॉक घेण्यात येईल. त्यामुळे छत्रपती शिवाजी महाराज टर्मिनसवरून सकाळी ९:३४ ते दुपारी ३:०३ पर्यंत सुटणाऱ्या अप आणि डाऊन जलद/सेमी-जलद लोकल ठाणे आणि कल्याण स्थानकांदरम्यान धिम्या मार्गावर वळवल्या जातील. या सेवा त्यांच्या संबंधित थांब्यांव्यतिरिक्त कळवा, मुंब्रा आणि दिवा स्थानकांवर थांबतील. तसेच सीएसएमटी/दादर येथून सुटणाऱ्या डाऊन मेल/एक्स्प्रेस ठाणे आणि कल्याण स्थानकांदरम्यान पाचव्या मार्गावर वळवल्या जातील. तर अप मेल/एक्स्प्रेस कल्याण आणि ठाणे/विक्रोळी स्थानकांदरम्यान सहाव्या मार्गावर वळवल्या जातील.

हार्बर मार्गावर वडाळा रोड - मानखुर्ददरम्यान अप आणि डाऊन मार्गावर सकाळी ११ ते संध्याकाळी ४ पर्यंत ब्लॉक घेण्यात येणार असून, या काळात यादरम्यानच्या फेऱ्या बंद राहतील. या काळात पनवेल-मानखुर्द-पनवेल मार्गावर विशेष लोकल चालवल्या जातील. या काळात हार्बरवरील प्रवाशांना सकाळी १० ते संध्याकाळी ४:३० पर्यंत ट्रान्स हार्बर लाइन व मुख्य मार्गिकेवरून प्रवास करण्याची परवानगी आहे.

पश्चिम रेल्वेवरील वसई रोड आणि भाईंदर दरम्यान शनिवारी मध्यरात्री १२:३० ते रविवारी पहाटे ४ पर्यंत मेगा ब्लॉक आहे. या कालावधीत विरार/ वसई आणि बोरीवली/भाईंदरदरम्यान धिम्या लोकल जलद मार्गावर वळविण्यात येतील.