एशियाटिक सोसायटीला गतवैभव देऊ : सहस्त्रबुद्धे; 'एशियाटिक टुमॉरो'ची भूमिका स्पष्ट

एशियाटिक सोसायटीला गतवैभव प्राप्त करून देण्यासाठी प्रयत्नशील असून संस्थेचा परीघ वाढवण्यासाठी प्रयत्न करणार असल्याची ग्वाही एशियाटिक टुमॉरो पॅनेलचे अध्यक्षपदाचे उमेदवार माजी खासदार विनय सहस्रबुद्धे यांनी पत्रकार परिषदेत दिली.

मुंबई : एशियाटिक सोसायटीला गतवैभव प्राप्त करून देण्यासाठी प्रयत्नशील असून संस्थेचा परीघ वाढवण्यासाठी प्रयत्न करणार असल्याची ग्वाही एशियाटिक टुमॉरो पॅनेलचे अध्यक्षपदाचे उमेदवार माजी खासदार विनय सहस्रबुद्धे यांनी पत्रकार परिषदेत दिली. यावेळी विवेक गणपुळे व डॉ. प्राची मोघे उपस्थित होते. संस्थेत नवीन सदस्यत्व देण्याच्या मुद्यावरून बंगालप्रमाणे एसआयआर राबवण्याची गरज गणपुळे यांनी व्यक्त केली. सोसायटीची बहुचर्चित निवडणूक शनिवारी १४ मार्चला होत आहे. 

एका राजकीय पक्षाच्या बँक खात्यातून थेट एशियाटिक सोसायटीच्या खात्यात जमा केलेल्या ५० हून अधिक नव्या सदस्यांच्या शुल्कासंदर्भात कोणताही आक्षेप का नोंदवलेला नाही? त्यांचे हे मौन या कृत्याला समर्थन दर्शवते, असा आरोप यावेळी विरोधकांवर करण्यात आला. दरम्यान, सुमारे २१८  वर्षांचा इतिहास असलेली संस्था मुंबईसह राज्यातील महत्त्वाची संस्था आहे, प्रतीकात्मक वास्तू आहे, त्याचे पावित्र्य जपायला हवे, त्यामुळे निवडणूक नियमानुसार व्हावी ही आमची अपेक्षा, कोणतेही गैरप्रकार होता कामा नयेत, असे सहस्रबुद्धे म्हणाले.

कारभारातील वैचारिक अस्पृश्यता नष्ट करणार

१. सोसायटीच्या कारभारात सध्या सुरू असलेला गोंधळ, आर्थिक अनियमितता आणि वैचारिक अस्पृश्यता आदी घटक नष्ट करण्याकरिता कटिबद्ध असल्याचे सांगण्यात आले. 

२. आर्थिक दायित्वासह संसाधनांची उभारणी करणे, विस्तार आणि जनसंपर्काला प्राधान्य देणे, सर्वसमावेशकतेवर भर देणे, साहित्याच्या शास्त्रीय संरक्षणाला प्राथमिकता देणे, राष्ट्र प्रथम हे तत्त्व राबविण्याला प्राधान्य देण्यात येईल, असे सांगण्यात आले. 

३. एशियाटिक टुमॉरो पॅनलमध्ये अध्यक्षपदासाठी डॉ. विनय सहस्रबुद्धे, उपाध्यक्ष पदासाठी रमेश पतंगे, डॉ. चंद्रप्रकाश द्विवेदी, डॉ. नितीश भारद्वाज, डॉ. संजय देशमुख, सचिव पदासाठी विवेक गणपुळे यांचा समावेश आहे.