गोरेगावात तुफान राडा, पोलिसांची थेट बुलडोझर कारवाई; सोमय्या घटनास्थळी 'हनुमान चालीसा' पठण करणार

Mumbai Goregaon Crime : गोरेगावमधील दिंडोशी परिसरात रविवारी रात्री दोन गटांत तुफान राडा झाला. या हाणामारीत अनेक जण जखमी झाल्याची माहिती आहे.

मुंबई

Mumbai Goregaon Crime : गोरेगावमधील दिंडोशी परिसरात रविवारी रात्री दोन गटांत तुफान राडा झाला. या हाणामारीत अनेक जण जखमी झाल्याची माहिती आहे. पोलिसांनी याप्रकरणी तातडीने कारवाई करत दोन्ही गटांना पांगवण्याचं काम केलं तसंच मध्यरात्री ८ जणांना अटक केली आहे. विशेष म्हणजे अटक करण्यात आलेल्या आरोपींची घरं अनधिकृत असल्याचं निदर्शनास आल्यानंतर आज सकाळी पोलीस बंदोबस्तात आरोपींच्या घरांवर थेट बुलडोझर कारवाई करण्यात आली आहे. 

दिंडोशी येथील संतोष नगर मार्केट परिसरात मरियम माता शोभा यात्रा दरम्यान राड्याचा प्रकार घडला होता. पोलिसांना राड्याची माहिती मिळताच घटनास्थळी पोहोचून कारवाई केली गेली. तसंच सीसीटीव्ही फुटेजच्या आधारे आरोपींची ओळख पटवून ८ जणांना अटक केली गेली. कारवाईवेळी पोलिसांनी जमावाला पांगवण्याचा प्रयत्न केला. परिस्थिती नियंत्रणात आणण्यासाठी पोलिसांना सौम्य लाठीचार्ज देखील करवा लागला. दोन गटांतील या राड्यात बजरंग दलाचे तीन कार्यकर्ते जखमी झाल्याचे सांगण्यात येत आहे. जखमींवर जोगेश्वरीच्या ट्रॉमा केअर रुग्णालयात उपचार सुरू आहेत. 

दरम्यान, या घटनेनंतर परिसरात मोठा पोलीस बंदोबस्त तैनात करण्यात आला असून संतोष नगर परिसराला पोलीस छावणीचे स्वरुप प्राप्त झाले आहे. सध्या परिस्थिती नियंत्रणात असून पोलीस अधिक तपास करत आहेत. 

आरोपींच्या घरांवर कारवाईसंतोष नगर परिसरात अनधिकृत बांधकामांबाबत पालिकेकडे याआधीच तक्रारी आल्या होत्या. पण कालच्या राड्यानंतर अटक केले गेलेले आरोपी याच अनधिकृत घरांमध्ये वास्तव्याला असल्याचं निदर्शनास आल्यानंतर आज पालिकेनं पोलिसांच्या बंदोबस्तात परिसरातील अनधिकृत बांधकामांवर बुलडोझर चालवण्यास सुरुवात केली. 

किरीट सोमय्या हनुमान चालीसा पठण करणारसमोर आलेल्या माहितीनुसार, घटनास्थळावर आज संध्याकाळी एका धार्मिक कार्यक्रमाचे आयोजन करण्यात आले असून भाजप नेते किरीट सोमय्या यांच्या उपस्थितीत हनुमान चालीसाचे पठण करण्यात येणार असल्याचे सांगितले जात आहे. बजरंग दलाच्या कार्यकर्त्यांना मारहाण आणि अनधिकृत वस्त्यांमधील आरोपींची नावं पुढे आल्याने किरीट सोमय्या आक्रमक झाले आहेत. त्यामुळे परिसरात तणावपूर्ण वातावरण आहे. यापार्श्वभूमीवर पोलीस आता सोमय्यांच्या भूमिकेवर काय निर्णय घेतात हे पाहणं महत्त्वाचं असणार आहे.