मुंबई : मुंबई सेंट्रलमध्ये जिया इमारतीला आग लागली होती. अग्निशमन दलाच्या 8 गाड्या घटनास्थळी दाखल झाल्या आणि आगीवर ताबा मिळवण्यात यश आलं. सुदैवाने यामध्ये कोणीही जखमी झाल्याचं वृत्त नाही. इमारतीत अडकलेल्या एका व्यक्तीला आणि लिफ्टमध्ये अडकलेल्या 4 जणांना सुखरूप बाहेर काढण्यात अग्निशमन दलाला यश आलं.
दुपारी 12 वाजण्याच्या सुमारास या सहा मजली इमारतीला आग लागली. आगीचं नेमकं कारण अजून समजू शकलेलं नाही. मिळालेल्या प्राथमिक माहितीनुसार इमारतीच्या बेसमेंटला ही आग लागली. बेसमेंटला असलेल्या तीन दुकानांना ही आग लागल्याचं समजतं.