शिंदेसेनेकडून ४० स्टार प्रचारकांची यादी जाहीर; गोविंदासह अनुभवी नेत्यांकडे प्रचाराची धुरा!

Eknath Shinde Shiv Sena 40 Star Campaigners: मुंबई महानगरपालिकेच्या पार्श्वभूमीवर शिंदेसेनेने त्यांच्या ४० स्टार प्रचारकांची यादी जाहीर केली.

राज्यातील आगामी महापालिका निवडणुकांचे बिगुल वाजले असून, राजकीय हालचालींना वेग आला आहे. या पार्श्वभूमीवर शिवसेनेने आपल्या ४० स्टार प्रचारकांची अधिकृत यादी जाहीर केली. महापालिकांच्या सत्तासंघर्षात विजयाचा झेंडा फडकवण्यासाठी पक्षाने अनुभवी आणि मोठ्या नेत्यांची तगडी फौज मैदानात उतरवली आहे. पक्षाची धोरणे आणि विकासकामे जनतेच्या मनापर्यंत पोहोचवण्यासाठी ही टीम महत्त्वाची भूमिका बजावेल, असा विश्वास त्यांनी व्यक्त केला आहे. 

शिवसेनेने जाहीर केलेल्या या यादीत पक्षाचे ज्येष्ठ नेते, खासदार, आमदार आणि आक्रमक प्रवक्त्यांचा समावेश करण्यात आला आहे. विशेष म्हणजे, स्थानिक पातळीवर जनसंपर्क असलेल्या वरिष्ठ पदाधिकाऱ्यांनाही या यादीत स्थान देण्यात आले. निवडणूक प्रचार अधिक प्रभावी आणि व्यापक व्हावा, या उद्देशाने पक्षाने आपल्या नेत्यांवर महत्त्वाची जबाबदारी सोपवली आहे.

शिंदेसेना- स्टार प्रचारक यादी

क्र.	नाव	पद
१	एकनाथ शिंदे	उप-मुख्यमंत्री
२	रामदास कदम	नेते
३	गजानन कीर्तिकर	नेते
४	आनंदराव अडसूळ	नेते
५	श्रीकांत शिंदे	खासदार
६	प्रतापराव जाधव	केंद्रीय मंत्री
७	निलमताई गोऱ्हे	नेत्या
८	मीनाताई काकडे	नेत्या
९	गुलाबराव पाटील	नेते व मंत्री
१०	दादाजी भुसे	उपनेते व मंत्री
११	उदय सामंत	उपनेते व मंत्री
१२	शंभूराज देसाई	उपनेते व मंत्री
१३	संजय राठोड	मंत्री
१४	संजय शिरसाट	प्रवक्ते व मंत्री
१५	भरत गोगावले	उपनेते व मंत्री
१६	प्रकाश आबिटकर	मंत्री
१७	प्रताप सरनाईक	मंत्री
१८	आशिष जयस्वाल	राज्यमंत्री
१९	योगेश कदम	राज्यमंत्री
२०	दीपक केसरकर	प्रवक्ते व आमदार
२१	श्रीरंग बारणे	उपनेते व खासदार
२२	धैर्यशील माने	खासदार
२३	संदीपान भुमरे	खासदार
२४	नरेश मस्के	खासदार
२५	रविंद्र वायकर	खासदार
२६	मिलिंद देवरा	खासदार
२७	दीपक सावंत	उपनेते व माजी मंत्री
२८	शाहाजी बापू पाटील	उपनेते व माजी आमदार
२९	राहुल शेवाळे	उपनेते व माजी खासदार
३०	मनीषा कायंदे	सचिव व आमदार
३१	निलेश राणे	आमदार
३२	संजय निरुपम	प्रवक्ते
३३	राजू वाघमारे	प्रवक्ते
३४	ज्योती वाघमारे	प्रवक्ते
३५	प्रविण सरनाईक	युवासेना कार्याध्यक्ष
३६	राहुल लोंढे	युवासेना सचिव
३७	अक्षयमहाराज भोसले	प्रवक्ते व अध्यक्ष, शिवसेना धर्मवीर आध्यात्मिक सेना
३८	समीर काझी	कार्याध्यक्ष, अल्पसंख्याक विभाग
३९	शायदा एन.सी.	राष्ट्रीय प्रवक्त्या
४०	गोविंदा अहुजा	माजी खासदार

पक्षाने स्पष्ट केल्यानुसार, हे स्टार प्रचारक गेल्या काही काळातील यशस्वी प्रकल्प आणि विकासकामे जनतेपर्यंत पोहोचवणे, शिवसेनेची विचारधारा आणि भविष्यातील नियोजित धोरणांचा प्रसार करणे आणि तळागाळातील शिवसैनिकांना सक्रिय करून पक्षाची ताकद वाढवणे, या मुद्द्यांवर भर देतील.

येत्या काही दिवसांत हे सर्व ४० नेते राज्यातील विविध महानगरपालिका क्षेत्रांमध्ये दौरे करणार आहेत. जाहीर सभा, कोपरा सभा आणि थेट जनसंपर्क या माध्यमांतून मतदारांना साद घालण्याचे नियोजन पक्षाने केले आहे. शिवसेनेच्या या आक्रमक रणनीतीमुळे महापालिका निवडणुकीतील रंगत आता अधिकच वाढणार आहे.