चीनप्रश्नी केंद्राने भूमिका स्पष्ट करावी, मनोज नरवणेंचे पुस्तक प्रसिद्ध करा; काँग्रेसचे आंदोलन

Congress News: जवानांचे बलिदान व्यर्थ जाऊ देणार नाही, असा इशारा देण्यात आला.

Congress News: चीन प्रश्नी मोदी सरकारचा गलथानपणा आणि लोकसभेत विरोधी पक्षनेते राहुल गांधी यांना बोलू न दिल्याच्या निषेधार्थ मुंबई युवक काँग्रेसच्या वतीने आंदोलन करण्यात आले. यावेळी विविध घोषणांनी परिसर दणाणून सोडला. केंद्र सरकार विरोधात संतप्त भावना व्यक्त करत युवक काँग्रेसच्या कार्यकर्त्यांनी केंद्र सरकारकडून तात्काळ उत्तरांची मागणी केली.

देशाच्या सुरक्षेशी संबंधित प्रश्नांवर केंद्र सरकार मौन बाळगत असून सत्य दडपले जात आहे. गलवान प्रकरणावर काय लपवले जात आहे, असा प्रश्न उपस्थित करून चीन प्रश्नावर केंद्र सरकारने देशाला स्पष्ट उत्तर द्यावे तसेच माजी लष्करप्रमुख जनरल मनोज नरवणे यांचे पुस्तक तात्काळ प्रसिद्ध करण्यात यावे, अशी मागणी यावेळी करण्यात आली.

दरम्यान, २०२० मधील चीन संघर्षासंदर्भात माजी लष्करप्रमुख जनरल मनोज नरवणे यांनी केलेल्या गंभीर खुलाशांवर संसदेत बोलण्यापासून विरोधी पक्षनेते राहुल गांधी यांना रोखण्यात आल्याने देशात तीव्र संताप व्यक्त होत आहे. लष्कराच्या स्पष्ट सूचनांनंतरही केंद्र सरकारने वेळीच निर्णय न घेतल्यामुळे शूर जवानांना हौतात्म्य पत्करावे लागले. या जवानांच्या मृत्यूस जबाबदार असलेल्यांची जबाबदारी निश्चित करून त्यांच्यावर कारवाई करण्यात यावी. जवानांचे बलिदान व्यर्थ जाऊ देणार नाही, असा इशारा देण्यात आला.