बिल्डरकडून गिरणी कामगारांची दिशाभूल, गुन्हा दाखल होणार

प्रसाद लाड यांनी तारांकित प्रश्नाद्वारे हा प्रश्न उपस्थित केला होता.

लोकमत न्यूज नेटवर्क, मुंबई : म्हाडाचे नाव आणि लोगोचा गैरवापर करून गिरणी कामगारांची दिशाभूल करणाऱ्या विकासक चढ्ढा डेव्हलपर्स अँड प्रमोटर्सविरोधात गुन्हा दाखल करण्याचे निर्देश म्हाडा उपाध्यक्षांना देण्यात येतील, असे पर्यटन मंत्री शंभूराज देसाई यांनी सोमवारी विधान परिषदेत सांगितले.

प्रसाद लाड यांनी तारांकित प्रश्नाद्वारे हा प्रश्न उपस्थित केला होता. शेलू आणि वांगणी येथे ८१ हजार घरे खासगी बिल्डरच्या माध्यमातून बांंधण्याचा निर्णय गृहनिर्माण विभागाने घेतला. मात्र, विकासक परस्पर गिरणी कामगारांशी संपर्क साधून दिशाभूल करून पैसे उकळत आहे. बळजबरीने संमतीपत्र भरून घेत असून विकासकावर कारवाई करावी, अशी मागणी आ. लाड यांनी केली.

मंत्री देसाई उत्तर देताना म्हणाले, प्रकल्पाच्या जाहिरातीसाठी दहा अटी व शर्तींच्या अधीन राहून विकासकाला म्हाडाचे नाव व लोगो वापरण्याची परवानगी दिली होती. मात्र, इतर प्रकल्पासाठी त्याने म्हाडाचे नाव व लोगो वापरून गैरवापर केल्याचे निदर्शनास आले आहे.