शिवसेनेचा गोव्यात सत्ता स्थापनेचा निर्धार: उदय सामंत; शिंदे गटाचा मेळावा

२०२७ च्या विधानसभा निवडणुकीत शिवसेना तब्बल ३० जागा लढवणार असून गोव्यात सत्ता स्थापन करण्याचा निर्धार करण्यात आला आहे.

लोकमत न्यूज नेटवर्क, डिचोली: गोवा राज्य शिवसेना पक्षाची राज्य कार्यकारिणी बैठक येथील हिराबाई झांट्ये सभागृहात झाली. आगामी २०२७ च्या गोवा विधानसभा निवडणुकीत शिवसेना तब्बल ३० जागा लढवणार असून गोव्यात सत्ता स्थापन करण्याचा निर्धार पक्षाने केल्याचे महाराष्ट्राचे उद्योगमंत्री तथा शिवसेनेचे नेते उदय सामंत यांनी यावेळी सांगितले. डिचोली येथे शिवसेने शिंदे गटाचा राज्य कार्यकर्ता मेळावा आयोजित करण्यात आला होता.

या मेळाव्यात शिवसेनेचे नेते व गोवा राज्य संपर्क प्रमुख गजानन कीर्तीकर, महाराष्ट्राचे मुख्यमंत्री एकनाथ शिंदे यांचे सचिव बालाजी खतगावकर, शिवसेनेचे महाराष्ट्र सचिव संजय मोरे, स्थानिक लोकाधिकार सेनेचे सरचिटणीस अरुण मोरे, गोव्याचे संपर्क प्रमुख सुभाष सावंत, राज्य प्रमुख उपेंद्र गावकर, राज्य सचिव काशिनाथ मयेकर, दक्षिण गोवा जिल्हा संपर्कप्रमुख प्रकाश पावसकर, उत्तर गोवा जिल्हा संपर्कप्रमुख मिलिंद प्रधान तसेच मुंबईचे विभाग प्रमुख राजू पेडणेकर व दिलीप नाईक आदी उपस्थित होते.

बैठकीत उदय सामंत म्हणाले की, महाराष्ट्राचे मुख्यमंत्री एकनाथ शिंदे यांनी गोव्यात निवडणूक लढवण्याची पूर्ण तयारी केली आहे. आम्ही केवळ निवडणूक लढवण्यासाठी नव्हे, तर गोव्यात थेट सत्ता स्थापन करण्यासाठी २०२७ ची रणधुमाळी गाजवणार आहोत. पक्ष कोणत्याही दबावाला बळी पडणार नाही. ज्या उमेदवारांमध्ये निवडून येण्याची आणि काम करण्याची क्षमता असेल, त्यांनाच पक्षाकडून उमेदवारी दिली.