केतन भाटीकर काँग्रेसमध्ये प्रवेश करण्यास इच्छूक: अमित पाटकर; चर्चेनंतर अंतिम निर्णय घेणार

अमित पाटकर यांनी सांगितले की, केतन भाटीकर यांनी पक्षात सामील होण्याबाबत सकारात्मक भूमिका मांडली

लोकमत न्यूज नेटवर्क, पणजी : फोंड्यातील युवानेते केतन भाटीकर यांनी आपली भेट घेऊन काँग्रेसमध्ये प्रवेश करण्याची इच्छा व्यक्त केली आहे. मात्र या संदर्भात अंतिम निर्णय पक्षाच्या ब्लॉक कमिटीशी चर्चा करूनच घेतला जाईल, अशी माहिती काँग्रेसचे प्रदेशाध्यक्ष अमित पाटकर यांनी दिली.

अमित पाटकर यांनी सांगितले की, केतन भाटीकर यांनी पक्षात सामील होण्याबाबत सकारात्मक भूमिका मांडली असून स्थानिक पातळीवरील पक्ष संघटनेशी चर्चा करणे आवश्यक आहे. पक्षाच्या कार्यपद्धतीनुसार ब्लॉक कमिटीच्या मतानंतरच पुढील निर्णय जाहीर केला जाईल.

सध्या पक्षाचे प्रमुख लक्ष्य आगामी फोंडा पोटनिवडणुकीत भाजपचा पराभव करणे हे आहे. त्यासाठी काँग्रेस संघटनात्मक पातळीवर तयारी करत असून सर्व कार्यकर्त्यांनी एकजुटीने काम करावे. काँग्रेस पक्ष राज्यात संघटना मजबूत करण्यासाठी विविध स्तरांवर प्रयत्न करत असून नवीन कार्यकर्ते व नेत्यांचे स्वागत केले जाईल, असेही त्यांनी सांगितले.