तारक मेहता का उल्टा चष्मा ही मालिका प्रेक्षकांना प्रचंड आवडते. या मालिकेतील प्रत्येक व्यक्तिरेखा प्रेक्षकांनी अक्षरशः डोक्यावर घेतल्या आहेत. ही मालिका गेल्या अनेक वर्षांपासून प्रेक्षकांचे मनोरंजन करत आहे. या मालिकेतील सगळ्याच व्यक्तिरेखा आता प्रेक्षकांना त्यांच्यातील एक वाटू लागल्या आहेत आणि त्यातही या मालिकेतील दयाबेन ही भूमिका तर प्रेक्षकांना प्रचंड आवडते. या मालिकेमुळे दिशा वाकानीला प्रचंड लोकप्रियता मिळाली.
दिशा तारक मेहता का उल्टा चष्मा या मालिकेत कधी परतणार याची तिचे चाहते आतुरतेने वाट पाहात आहेत. दिशा मालिकेत नसली तरी सोशल मीडियाच्या माध्यमातून नेहमीच तिच्या चाहत्यांच्या संपर्कात असते. ती इन्स्टाग्रामवर तिचे फोटो पोस्ट करत असते. त्याचसोबत ती सोशल नेटवर्किंग साईटद्वारे तिच्या फॅन्सशी गप्पा देखील मारते. तिने आता नुकताच तिच्या मुलीचा फोटो इन्स्टाग्रामवर पोस्ट केला आहे. दिशाच्या मुलीचे नाव स्तुती असून या पोस्टमध्ये ती दोन-तीन महिन्यांची असतानाचा आणि आताचा असे दोन फोटो आपल्याला पाहायला मिळत आहे. तिची मुलगी खूपच क्यूट असल्याचे सोशल मीडियाद्वारे लोक तिला सांगत आहेत.
दिशा वाकानी गेल्या अनेक महिन्यांपासून मालिकेतून गायब आहे. दिशाने गेल्या वर्षी एका गोंडस मुलीला जन्म दिला. दिशा गरोदर असताना देखील मालिकेचे चित्रीकरण करत होती. पण तिची मुलगी लहान असल्याने ती मालिकेपासून गेल्या कित्येक महिन्यांपासून दूर आहे. प्रेक्षकांची लाडकी दयाबेन म्हणजेच दिशा वाकानी मालिकेत केव्हा परतेल याची प्रेक्षक आतुरतेने वाट पाहात आहेत.
दिशाच्या परतण्याबाबत तारक मेहता का उल्टा चष्मा या मालिकेचे निर्माते असित कुमार मोदी यांनी एका वृत्तवाहिनीशी बोलताना सांगितले होते की, दया या मालिकेत परत कधी येईल याची सगळेजण आतुरतेने वाट पाहात आहेत. त्यामुळे ही व्यक्तिरेखा लवकरच प्रेक्षकांना मालिकेत पाहायला मिळणार आहे. दिशा परत येण्याची शक्यता खूपच जास्त आहे. पण त्याचसोबत आम्ही काही अभिनेत्रींशी देखील या भूमिकेबाबत चर्चा करत आहोत.