​करण जोहर आणि रोहित शेट्टी शोधत आहेत सामान्य लोकांमधून त्यांच्या चित्रपटासाठी कलाकार

छोट्या पडद्यावर एका पाठोपाठ एक रिअॅलिटी शो रसिकांच्या भेटीस येत आहेत. याच यादीत आता आणखीन एका शोची भर पडणार आहे. इंडियाज्‌ नेक्स्ट सुपरस्टार्स हा कार्यक्रम प्रेक्षकांच्या भेटीस येणार असून या कार्यक्रमाद्वारे प्रेक्षकांना अभिनय क्षेत्रातील त्यांची स्वप्नं पूर्ण करण्याची संधी मिळणार आहे. करण जोहर आणि रोहित शेट्टी हे सामान्य लोकांसाठी बॉलिवूडचे दरवाजे केवळ खुलेच करत नाहीयेत, तर त्यांच्या सिनेमांमध्ये या शोमधील विजेत्यांना ब्रेकही देणार आहेत. करण जोहर आणि रोहित शेट्टी हे आगामी रिअॅलिटी शो इंडियाज्‌ नेक्स्ट सुपरस्टार्ससाठी एकत्र येणार असून ते आपल्या पुढील चित्रपटांमधील प्रमुख व्यक्तिरेखांच्या शोधात आहेत. करण आणि रोहित पुढील काळात सिंबा या चित्रपटाची मिळून निर्मिती करणार आहेत. या चित्रपटात रणवीर सिंग प्रमुख भूमिकेत आहे. रणवीरने आजपर्यंत अनेक चित्रपटांमध्ये खूप वेगवेगळ्या प्रकारच्या भूमिका साकारल्या आहेत. करण जोहर आणि रोहितच्या या चित्रपटातील मुख्य कलाकाराची निवड तर झाली आहे. आता ते आणखी काही महत्त्वाच्या भूमिकेसाठी या कार्यक्रमाद्वारे कलाकार शोधत असल्याची चर्चा आहे.करण किंग ऑफ ड्रामा म्हणून तर रोहित किंग ऑफ अॅक्शन म्हणून ओळखले जातात. त्यामुळे ते दोघे एकत्र आल्यानंतर प्रेक्षकांचे चांगलेच मनोरंजन होणार यात काहीच शंका नाही. या कार्यक्रमाबद्दल करण जोहर सांगतो, एखाद्या सिनेमातील हिरोप्रमाणे मिळणारे प्रेम आणि त्याच्यासाठी असलेला वेडेपणा खरोखरच अद्‌भुत असतो. त्यामुळे सिनेमांचा हिस्सा बनणे हे अनेकांचे स्वप्न असते. त्यातही सिनेमामुळे तुम्ही जगभरात पोहचतात त्यामुळे हे सगळे अनुभवण्याची प्रत्येकाची इच्छा असते. त्यामुळे त्यांचे स्वप्न पूर्ण करण्यासाठी प्रत्येकजण अहोरात्र मेहनत करत असतो. त्यामुळे  इंडियाज्‌ नेक्स्ट सुपरस्टार्स हा एक असा शो आहे जिथे भावी अभिनेत्यांना त्यांचे हे स्वप्न पूर्ण करण्याची संधी देणार आहे. त्यांच्या स्वप्नांना योग्य तो मार्ग दाखवण्याचे काम हा शो करत आला आहे. रोहित शेट्टीसोबत स्टार प्लससारख्या मंचावर उद्याचा सुपरस्टार शोधण्याच्या ह्या प्रवासावर निघताना मी खूप उत्सुक आहे.Also Read : ​करण जोहरने नेपोटिझमवरील वाद संपवला?