Birthday Celebration:असा साजरा केला या कलाकरांनी त्यांच्या मुलांचा पहिला वाढदिवस

सेलिब्रिटी मंडळी आणि त्यांच्या मुलांमध्ये वेगळं नातं असतं. आपल्या मुलांबद्दल जिव्हाळा, प्रेम आणि आपुलकी या मंडळींमध्ये पाहायला मिळते. बाळाच्या जन्मापासून त्याच्या प्रत्येक गोष्टी आपल्या फॅन्ससोबत शेअर करायला या मंडळींना आवडतात. विशेषतः आपल्या बाळाचा जन्म आणि वाढदिवसाचं सेलिब्रेशन याबाबत सेलिब्रिटी बरेच भावुक आणि तितकेच आनंदी अन् उत्साही असतात. त्यात आपल्या लाडक्या बाळाचा पहिला वाढदिवस असले तर या सेलिब्रिटींच्या आनंदालाही पारावर उरत नाही. याचीच प्रचिती नुकतीच पाहायला मिळाली.  नुकतंच प्रसिद्ध अभिनेता स्वप्नील जोशीनं आपल्या लेकीचा पहिला वाढदिवस उत्साहात आणि आनंदात साजरा केला. स्वप्नीलची लाडकी लेक मायरा आता एक वर्षाची झाली. मायरा स्वप्नीलच्या जीवनात आनंद घेऊन आली आहे. वर्षभराआधी 23 मे रोजी मायराचं स्वप्नीलच्या कुटुंबात आगमन झालं. आपल्या गोड कुटुंबात नवा पाहुणा येणार हे कळल्यापासूनच स्वप्नील आणि त्याचे कुटुंबीय आनंदी होते आणि नव्या पाहुण्याची आतुरतेने वाट पाहत होते. त्यानंतर तो दिवस आला आणि गोड परी स्वप्नीलच्या आयुष्यात आली. तिच्या येण्यानं जणू स्वप्नीलचं जीवन पालटलं. आपल्या लाडक्या लेकीसाठी त्यानं पुढील काही महिने सिनेमाचं शुटिंगसुद्धा केलं नाही. इतकंच नाही तर शुटिंगसोबतच महत्त्वाच्या बैठकाही त्यानं रद्द केल्या. आपला सारा वेळ आपल्या लाडक्या परी मायरासाठी असावा असं त्याला वाटत होतं. मायराचं बालपण स्वप्नील खूप खूप एन्जॉय करत आहे. तिच्याशी संबंधित प्रत्येक गोष्ट तो आपल्या फॅन्सशी आणि मित्रपरिवार, नातेवाईकांशी शेअर करत आहे. तिच्याशी खेळणं, मायराचं घरात रांगणं, तिचे ते बोबडे बोल, तिला लाडानं भरवणं अशा सगळ्या गोष्टी त्यानं शेअर केल्या. हे सगळं करता करता आणि बघता बघता वर्ष कधी सरलं हे खुद्द स्वप्नीललाही कळलं नाही. आता मायरा एक वर्षाची झाली. त्यामुळंच तिचा पहिला वाढदिवस स्वप्नीलसाठी थोडा खास होता. स्वप्नीलनं तिच्या वाढदिवसाचं खास प्लानिंग केलं होतं. स्वप्नीलची लाडकी परी असलेल्या मायराला शुभेच्छा आणि आशीर्वाद देण्यासाठी स्वप्नीलच्या कुटुंबीयांसह, नातेवाईक आणि मित्रांनी आवर्जून हजेरी लावली होती. दिग्दर्शिका स्वप्ना वाघमारे, माधवी निमकर, समिधा गुरु, अभिजीत गुरुसह चित्रपटसृष्टीतील त्याच्या मित्रांनी यावेळी उपस्थिती लावली. मायराच्या पहिल्या वाढदिवसाच्या सेलिब्रेशनचे फोटो स्वप्नीलनं त्याच्या चाहत्यांसाठी सोशल मीडियावर शेअर केलेत. वाढदिवसाचा दिवस निघून गेला असला तरी या फोटोंच्या माध्यमातून स्वप्नीलच्या फॅन्सकडून मायरावर शुभेच्छांचा वर्षाव सुरु आहे. यावर स्वप्नीलनंही फॅन्सना धन्यवाद म्हटलं आहे. मायराने तुम्हां सा-यांना थँक्यू म्हटलं आहे आणि आशीर्वाद तसंच प्रेम सदैव पाठीशी राहू द्या अशी पोस्टही त्याने शेअर केली आहे. स्वप्नीलप्रमाणेच ‘उतरन’ फेम अभिनेता रोहित खुराणा याच्यासाठीही त्याची लाडकी लेक स्पेशल आहे. वर्षभराआधी 6 एप्रिल रोजी रोहित आणि नेहा यांच्या आयुष्यात एका गोंडस परीचं आगमन झालं. लाडानं त्यांनी तिचं नाव सायशा असं ठेवलं. सायशाचा पहिला वाढदिवस रोहित आणि नेहानं मोठ्या उत्साहात तसंच जल्लोषात साजरा केला. आपल्या लाडक्या लेकीचे म्हणजेच सायशाचे फोटो रोहित आणि नेहानं सोशल मीडियावर शेअर केले होते. आपल्या लाडक्या परीवर असलेले प्रेम त्यांनी सोशल मीडियावरही व्यक्त केले होते.   करणवीर वोहरा आणि त्याची पत्नी टीजेसुद्धा आई-बाबाच्या भूमिकेत चांगलेच रुळले आहे. आपली लाडकी मुलं मिको आणि नोनू यांच्यावर त्यांनी आपलं सारं लक्ष केंद्रीत केलं आहे. आपल्या मुलांचा वाढदिवसही हे दोघं मोठ्या उत्साहात साजरा करतात.  'डान्स इंडिया डान्स' या रियालिटी डान्स शोमुळे प्रसिद्धीच्या शिखरावर पोहचलेला सलमान हा सुद्धा गेल्या वर्षी पिता बनला आहे. आपल्या अफलातून नृत्य कौशल्याच्या जोरावर अनेकांच्या गळ्यातील ताईत बनलेला सलमान युसूफ खान याच्या जीवनात मार्च 2016 मध्ये एका छोट्या डान्सर सलमानचं आगमन झालंय. नुकतंच सलमाननं त्याच्या बाळाचा पहिला वाढदिवस उत्साहात आणि आनंदात साजरा केला.