Stock Market Crash: मंगळवारचा दिवस (२१ जानेवारी) शेअर बाजारातील गुंतवणूकदारांसाठी 'अमंगळ' ठरल्याचे दिसत आहे. आठवड्याच्या दुसऱ्या दिवशी बाजारात पुन्हा एकदा घसरण पाहायला मिळत आहे. मंगळवारी निफ्टी ६ महिन्यांतील नीचांकी पातळीवर घसरला. हा निर्देशांक इंट्राडे २३,००० च्या खाली घसरला. निफ्टी आणि सेन्सेक्समध्ये १.५% ची घसरण दिसून आली. मिडकॅप आणि स्मॉलकॅप शेअर्समध्ये विक्री दिसून आली. बीएसईच्या सर्व सेक्टर इंडेक्समध्ये विक्री दिसून आली. रिॲल्टी, एनर्जी आणि पीएसई शेअर्समध्ये घसरण झाली. ऑटो, बँकिंग आणि आयटी समभागांमध्ये विक्री झाली.
परकीय गुंतवणूकदारांचा दगा?एफआयआयच्या विक्रीचा परिणाम पुन्हा एकदा दिसून आला असून प्रमुख निर्देशांक १-२% नी घसरले. बाजारातील एका शेअरच्या वाढीनंतर ४० शेअर्समध्ये घसरण झाली. या घसरणीसह, BSE वर सूचीबद्ध असलेल्या सर्व कंपन्यांच्या एकूण बाजार भांडवलात ७ लाख कोटींची घट झाली आहे.
कोणत्या पातळीवर बाजार बंद झाला?मंगळवारी दिवसभराच्या कामकाजानंतर सेन्सेक्स १,२३५ अंकांनी घसरला आणि ७५,८३८ वर बंद झाला. निफ्टी ३२० अंकांनी घसरून २३,०२५ वर बंद झाला. निफ्टी बँक ७८० अंकांनी घसरून ४८,५७१ च्या पातळीवर बंद झाला. निफ्टीचा मिडकॅप निर्देशांक १,२७१ अंकांनी घसरला आणि ५३,८३५ वर बंद झाला.
आज कोणत्या शेअर्समध्ये घडामोड?कमकुवत बाजारपेठेतही, सकारात्मक ब्रोकरेजच्या आधारे अपोलो हॉस्पिटल्स २% वाढीसह बंद करण्यात यशस्वी झाले. क्रूडच्या हालचालीचा परिणाम तेल विपणन कंपन्यांवरही दिसून आला. HPCL आज ३% वाढीसह बंद झाला. झोमॅटोच्या तिसऱ्या तिमाही निकालानंतर शेअर्सवर दबाव आला. झोमॅटो आज १०% खाली बंद झाला.
झोमॅटो व्यतिरिक्त नवीन युगातील इतर समभागांमध्येही विक्री दिसून आली. पेटीएम, Delhiver आणि स्विगी ५-८% ने घसरले. FSN ई-कॉमर्स २% खाली बंद झाला. ट्रेंट आता महत्त्वाच्या मूव्हिंग सरासरीच्या खाली घसरला आहे. टाटा समूहाचा हा शेअर जानेवारी २०२५ मध्ये निफ्टीचा सर्वात कमकुवत स्टॉक आहे. ब्रोकरेज कंपन्यांना डिक्सन टेक्नॉलॉजीजचे मूल्यांकन महाग पडले. हा स्टॉक आज १४% खाली बंद झाला. न्यूजेन सॉफ्टवेअर आज १४% खाली बंद झाले.