बाजारात नफावसुलीचा जोर! एअरटेल-इन्फोसिससह 'या' शेअर्समध्ये जोरदार घसरण; सेन्सेक्स-निफ्टी रेड झोनमध्ये

Stock Market Closing Today: सकाळच्या व्यवहाराची सुरुवात हिरव्या रंगात झाली आणि शेअर बाजाराने आठवड्याचा शेवट स्थिर राहिला.

Stock Market : भारतीय शेअर बाजारात शुक्रवारी, २८ नोव्हेंबर रोजी, मोठी अस्थिरता दिसून आली. दिवसभर चढ-उतारानंतर सेन्सेक्स आणि निफ्टी दोन्ही प्रमुख निर्देशांक किंचित घसरणीसह लाल निशाणीवर बंद झाले. सकाळच्या सत्रात दोन्ही निर्देशांकांनी नवा उच्चांक गाठला होता. परंतु, दिवसाअखेरीस नफावसुलीमुळे ही तेजी टिकू शकली नाही. दिवसाच्या व्यवहारादरम्यान सेन्सेक्सने ८५,९६९.८९ चा, तर निफ्टीने २६,२८०.७५ चा उच्चांक गाठला होता.

तज्ज्ञांचे मतभारत आणि अमेरिका यांच्यातील व्यापार कराराच्या चर्चेत प्रगती झाल्याच्या बातम्यांमुळे गुंतवणूकदारांचा मूड चांगला राहिला. ऑटो, बँकिंग-फायनान्शियल आणि फार्मासारख्या मोठ्या क्षेत्रांमध्ये शानदार खरेदी दिसून आली. अमेरिकेत टेक शेअर्समध्ये तेजी कायम असून, फेडरल रिझर्व्ह व्याजदर कमी करेल अशी अपेक्षा वाढली आहे, ज्यामुळे भारतीय बाजाराला पाठिंबा मिळाला. मागील काही दिवसांच्या जोरदार तेजीनंतर लहान आणि मध्यम शेअर्समध्ये नफावसुली निश्चितच दिसून आली, पण मोठ्या शेअर्सनी बाजाराला सावरले.

येणाऱ्या काळात दुसऱ्या तिमाहीचा जीडीपी डेटा आणि आयआयपी आकडेवारी अपेक्षित आहे, जे अर्थव्यवस्थेच्या अधिक सुधारणांचे संकेत देतील. एकूणच बाजाराचा दृष्टीकोन अजूनही सकारात्मक बनलेला आहे.

शुक्रवारचे टॉप गेनर्स स्टॉक

• महिंद्रा अँड महिंद्रा : २.१६% वाढ.
• सन फार्मा : १.१७% वाढ.
• कोटक महिंद्रा बँक : ०.७९% वाढ.
• हिंदुस्तान युनिलिव्हर : ०.७५% वाढ.
• अदानी पोर्ट : ०.५८% वाढ.

 

शुक्रवारचे टॉप लूजर्स स्टॉक

• पॉवर ग्रिड : १.३५% घसरण.
• भारती एअरटेल : ०.६८% घसरण.
• इटर्नल : ०.६६% घसरण.
• इन्फोसिस : ०.५६% घसरण.
• आयसीआयसीआय बँक : ०.३६% घसरण.

वाचा - बँक ग्राहकांनो लक्ष द्या! डिसेंबरमध्ये तब्बल १८ दिवस बँका बंद; सलग ५ दिवसांच्या सुट्ट्यांमुळे कामे खोळंबणार!

(टीप - यामध्ये सामान्य माहिती देण्यात आलेली आहे. हा गुंतवणूकीचा सल्ला नाही. शेअर बाजारातील गुंतवणूक जोखमीच्या अधीन असते. कोणत्याही प्रकारची गुंतवणूक करण्यापूर्वी या क्षेत्रातील जाणकार किंवा तज्ज्ञांचा सल्ला घेणं आवश्यक आहे.)