Share Market Down: सेन्सेक्स आणि निफ्टीमध्ये गुरुवारी बरेच चढउतार पाहायला मिळाले. हे दोन्ही निर्देशांक सकाळी चांगल्या तेजीसह उघडले, परंतु दुपारपर्यंत त्यानं तेजी गमावली आणि त्यात घसरण झाली. सेन्सेक्स सकाळी ५०४.५७ अंकांनी वधारून ८१,८१६.८९ वर पोहोचला होता, परंतु नंतर सर्व तेजी गमावून तो उच्चांकी पातळीपेक्षा सुमारे ६०० अंकांनी खाली घसरला. तर निफ्टीही सकाळी २४,८८९.७० वर गेला होता, पण दुपारपर्यंत तो २४,७५० पर्यंत खाली आला. असं का घडलं? शेअर बाजार पाडण्यामागे कोणती कारणं होती? चला जाणून घेऊया.
सर्वप्रथम बाजारात ही घसरण काही खास कारणांमुळे झाली. अमेरिकेतील महागाई दीर्घकाळ उच्च राहू शकते, अशी चिंता फेडरल रिझर्व्हच्या बहुतांश अधिकाऱ्यांना आहे, असं नोट्समध्ये म्हटलं आहे. त्यांनी व्याजदर स्थिर ठेवले, पण महागाई आणि नोकऱ्यांमध्ये समतोल साधणं त्यांना अवघड जात होता असा त्यांचा सूर होता. अमेरिकेतील महागाईचा विचार केला तर त्याचा फटका भारतासारख्या देशांनाही बसतो, कारण तेथील धोरणांचा परिणाम जागतिक बाजारपेठेवर होतो. गुंतवणूकदार सावध होतात आणि बाजारातील अस्थिरता वाढते.
Airtel नं आणले ३ नवे रिचार्ज प्लान्स, कमी किंमतीत अनलिमिटेड बेनिफट्स; OTT चाही मोफत लाभ
दुसरं कारण म्हणजे काही कंपन्यांच्या शेअर्समध्ये झालेली घसरण. जिओ फायनान्शियल सर्व्हिसेस, एचडीएफसी लाइफ इन्शुरन्स, भारत इलेक्ट्रॉनिक्स, बजाज फायनान्स आणि एचडीएफसी बँक या बड्या कंपन्यांचे शेअर्स २ टक्क्यांपर्यंत घसरले. बाजाराची दिशा ठरविण्यात या कंपन्या महत्त्वाच्या असल्यानं त्यांच्या घसरणीचा परिणाम सेन्सेक्स आणि निफ्टीवरही झाला. याशिवाय निफ्टी आणि बँक निफ्टीचे मंथली डेरिव्हेटिव्ह कॉन्ट्रॅक्ट गुरुवारी संपत आहे. अशा वेळी व्यापारी खबरदारी घेतात, त्यामुळे बाजारातील अस्थिरता वाढते.
युद्धासारखी परिस्थिती
आणखी एक कारण म्हणजे जगभरात सुरू असलेला भूराजकीय तणाव. जर्मनीचे चॅन्सेलर फ्रेडरिक मर्झ यांनी युक्रेनला लांब पल्ल्याच्या क्षेपणास्त्र प्रणाली पुरविण्याचं आश्वासन दिलं असून, या निर्णयामुळे पाश्चिमात्य देश आणि रशिया यांच्यात थेट संघर्ष होऊ शकतो, असा इशारा राष्ट्राध्यक्ष व्लादिमीर पुतिन यांनी दिला आहे. युक्रेनकडून अशा क्षेपणास्त्रांनी रशियावर हल्ला केल्यास तो जर्मन हल्ला मानला जाईल, असं एका तज्ज्ञाने सांगितले. याचे गंभीर परिणाम होऊ शकतात.
कच्च्या तेलाच्या दरवाढीचाही बाजारावर परिणाम झाला. ब्रेंट क्रूडचा भाव १.११ टक्क्यांनी वाढून ६५.६२ डॉलर प्रति बॅरल झाला आहे. भारतासारखे देश कच्च्या तेलाची आयात करत असल्यानं त्यांची चिंता वाढली आहे. तेलाच्या वाढत्या किमतींमुळे देशाचं आयात बिल वाढतं, रुपयाचं मूल्य कमकुवत होतं आणि महागाईचा धोका असतो. शेअर बाजारासाठी या सर्व नकारात्मक बातम्या आहेत.