Post Office ची दमदार योजना; दरमहा 5550 रुपयांची कमाई! किती गुंतवणूक करावी लागेल?

Post Office Scheme: पोस्ट ऑफिसकडून ग्राहकांसाठी विविध योजना राबवल्या जातात.

Post Office Scheme: पोस्ट ऑफिसकडून ग्राहकांसाठी विविध बचत आणि गुंतवणूक योजना राबवल्या जातात. त्यापैकी मंथली इनकम स्कीम (MIS) ही योजना विशेषतः नियमित मासिक उत्पन्न हवे असलेल्या गुंतवणूकदारांसाठी फायदेशीर मानली जाते. या योजनेत एकदाच गुंतवणूक केल्यानंतर दरमहा ठराविक व्याज मिळते.

एकदाच गुंतवणूक, दरमहा निश्चित उत्पन्न

MIS योजनेचे वैशिष्ट्य म्हणजे, वारंवार गुंतवणूक करण्याची गरज नाही. एकदा खाते उघडून रक्कम जमा केली की, लगेच मासिक उत्पन्न सुरू होते. सध्या पोस्ट ऑफिस या योजनेवर 7.4 टक्के वार्षिक व्याजदर देत आहे. हे व्याज थेट गुंतवणूकदाराच्या बँक खात्यात जमा केले जाते.

किमान गुंतवणूक 1,000 रुपये

या योजनेत केवळ 1,000 रुपयांपासून खाते उघडता येते. सिंगल अकाउंटमध्ये कमाल 9 लाख रुपयांपर्यंत गुंतवणूक करता येते. तर, जॉइंट अकाउंटमध्ये कमाल 15 लाख रुपयांपर्यंत गुंतवणूक शक्य असून, त्यात जास्तीत जास्त 3 जण सहभागी होऊ शकतात.

9 लाखांच्या गुंतवणुकीवर दरमहा 5,550 रुपये

जर एखाद्या गुंतवणूकदाराने सिंगल अकाउंटमध्ये 9 लाख रुपयांची एकरकमी गुंतवणूक केली, तर त्याला पुढील 5 वर्षे दरमहा सुमारे 5,550 रुपये निश्चित व्याज मिळते. ही रक्कम थेट बँक खात्यात जमा होत असल्याने ती नियमित उत्पन्नाचा विश्वासार्ह स्रोत ठरते.

5 वर्षांची मुदत, मूळ रक्कम सुरक्षित

MIS योजना 5 वर्षांत परिपक्व (मॅच्युअर) होते. मॅच्युअरिटीवेळी गुंतवलेली संपूर्ण मूळ रक्कम थेट बँक खात्यात परत मिळते. त्यामुळे या योजनेत मासिक व्याजासोबतच मूळ भांडवलही सुरक्षित राहते.

खाते उघडण्यासाठी आवश्यक अट

MIS खाते उघडण्यासाठी पोस्ट ऑफिसमध्ये सेव्हिंग अकाउंट असणे आवश्यक आहे. खाते सुरू झाल्यानंतर मासिक उत्पन्न त्वरित मिळू लागते आणि गरजेनुसार या पैशांचा वापर करता येतो.

कोणासाठी उपयुक्त?

सुरक्षित गुंतवणूक, निश्चित मासिक उत्पन्न आणि भांडवलाची हमी हवी असलेल्या ज्येष्ठ नागरिकांसह सर्वसामान्य गुंतवणूकदारांसाठी पोस्ट ऑफिसची मंथली इनकम स्कीम हा एक उत्तम पर्याय मानला जात आहे.