LMOTY 2025: बुधवारी मुंबईतील राजभवनात लोकमत महाराष्ट्रीयन ऑफ द इयर २०२५ हा सोहळा पार पडला. यावेळी लोकमत मीडियाचे सहव्यवस्थापकीय संचालक आणि संपादकीय संचालक ऋषी दर्डा यांनी बजाज फिनसर्व्हचे अध्यक्ष आणि व्यवस्थापकीय संचालक संजीव बजाज यांच्याशी अनेक मुद्द्यांवर संवाद साधला. यादरम्यान त्यांनी संजीव बजाज यांना त्यांच्या पोर्टफोलिओमध्ये बजाजशिवाय इतर कोणते स्टॉक्स आहेत याबाबत प्रश्न विचारला.
"केवळ कदाचित आमचंच कुटुंब असेल, ज्यांच्याकडे आमच्या स्वत:च्या स्टॉक्सशिवाय इतर कोणतेही स्टॉक्स नाहीत. आम्ही कधीही इतरत्र गुंतवणूक करण्यावर विश्वास ठेवत नाही," असं संजीव बजाज म्हणाले. यावेळी त्यांनी देशातील संधी, स्टार्टअप उद्योग, कामाचे तास यावरही सविस्तर मत व्यक्त केलं.
स्टार्टअप यशस्वी करण्याचा फॉर्म्युला काय?
"सर्वप्रथम तुमची आयडिया युनिक असायला हवी. दुसरं म्हणजे तुमच्या व्यवसायाबद्दल तुम्हाला पॅशन हवं. प्रत्येकाच्या आयुष्यात चढउतार येतात. पण, तुम्ही जर पॅशनेट असाल तर व्यवसाय यशस्वी होण्याची शक्यता जास्त आहे. तिसरं म्हणजे एक चांगली टीम तुम्ही तयार करायला हवी. कुठलाही व्यवसाय उभा करण्यासाठी चांगली टीम खूप महत्त्वाची आहे. चौथं आणि महत्त्वाचं म्हणजे तुम्हाला फंडिंग करणारा व्यक्ती तुमच्याकडे हवा. ही चतुसुत्री वापरली तर तुम्ही नक्कीच यशस्वी व्हाल," असं मत संजीव बजाज यांनी मांडले.
सुदैवानं मी यशस्वी झालो
नवीन व्यवसाय सुरू करण्याविषयी संजीव बजाज यांनी वक्तव्य केलं. "कोणताही स्टार्टअप यशस्वी करण्यासाठी प्रत्येक नवउद्योजक खूप मेहनत घेतात. यासाठी ते स्वतःच करिअर पणाला लावतो. स्वतःची बचतच नाही तर कुटुंबाची, मित्रांचेही पैसे सर्वकाही पणाला लावतो. याबाबतीत मी नशीबवान होतो. मला मोठ्या उद्योजक कुटुंबाचा वारसा लाभला. मात्र, स्वतःच्या जीवावर वेगळं काहीतरी उभं करायलाही हिंमत लागते. मी जेव्हा बजाज फिनसर्व्ह स्टार्टअप सुरू केलं, त्यावेळी तो छोटा होता. मला कुटुंबातील मोठ्या सदस्यांकडून मार्गदर्शन मिळत होतं. सुदैवाने मी यात अपयशी झालो नाही. परंतु, हा सर्व प्रवास रोमांचक होता," असं बजाज म्हणाले.