बालेन शाहंची संपत्ती किती? इंजिनिअरिंग बिझनेस, म्युझिक आणि रॅपमधून किती कमाई करतात नेपाळचे PM दावेदार

Nepal Balendra Shah Networth: नेपाळमधील तरुणांमध्ये 'बालेन' या नावाने लोकप्रिय असलेले बालेन्द्र शाह हे एक रॅपर आणि इंजिनिअर आहेत. २०२२ मध्ये अपक्ष उमेदवार म्हणून काठमांडूचे महापौर म्हणून निवडून आल्यानंतर त्यांनी आपल्या कामाची छाप पाडली. सध्या ते राष्ट्रीय स्वतंत्र पार्टी (RSP) सोबत जोडून घेऊन मोठ्या निवडणुका लढवत आहेत. त्यांच्या राजकीय कारकिर्दीसोबतच लोकांमध्ये त्यांच्या संपत्तीबाबत (Net Worth) मोठी उत्सुकता पाहायला मिळते.

पेट्रोल डिझेल बाबत काय म्हटलंय पेट्रोलियम कंपन्यांनी? सोशल मीडियावर पोस्ट करत दिली माहिती

बालेन शाह यांची एकूण संपत्ती किती?

'द वीक' आणि 'बिझनेस टुडे' सारख्या मीडिया रिपोर्ट्सनुसार, २०२५-२०२६ च्या आकडेवारीनुसार बालेन शाह यांची एकूण संपत्ती सुमारे ५ ते ६ कोटी नेपाळी रुपये (सुमारे ३० ते ३५ लाख भारतीय रुपये) आहे. त्यांची मासिक कमाई अंदाजे ३ लाख नेपाळी रुपये असल्याचं सांगितलं जातं. त्यांच्या कमाईचे तीन मुख्य स्रोत खालीलप्रमाणे आहेत:

महापौर वेतन: पदावर असताना त्यांना दरमहा ४६,००० नेपाळी रुपये मिळत होते (आता त्यांनी राजीनामा दिलाय).

इंजिनिअरिंग व्यवसाय: 'बालेन कन्सल्टिंग अँड कन्स्ट्रक्शन प्रायव्हेट लिमिटेड'चे ते व्यवस्थापकीय संचालक असून, या व्यवसायातून त्यांना महिन्याला २ लाखांहून अधिक उत्पन्न मिळतं.

संगीत आणि रॅपिंग: हिप-हॉप क्षेत्रात सक्रिय असल्यामुळे गाण्यांमधूनही त्यांना उत्पन्न मिळतं.

काही रिपोर्ट्समध्ये त्यांची संपत्ती ३ दशलक्ष डॉलर्स (सुमारे २५ कोटी रुपये) सांगितली गेली असली, तरी बहुतांश विश्वासार्ह स्रोत ५-६ कोटी नेपाळी रुपयांच्या आकड्यावर सहमत असल्याचं दिसतं.

खाजगी मालमत्ता आणि राहणीमान

बालेन शाह यांच्या खाजगी मालमत्तेबद्दल फारशी माहिती सार्वजनिक उपलब्ध नाही. ते काठमांडूच्या गैरीगाव (टिंकुने) भागात आपल्या पत्नी सबीना काफ्ले आणि मुलीसह एका साध्या घरात राहतात. त्यांच्याकडे अनेक घरे किंवा मोठी जमीन असल्याचं कोणतंही वृत्त नाही. महापौर म्हणून त्यांनी स्वतःची संपत्ती वाढवण्याऐवजी सार्वजनिक कामांवर भर दिला. त्यांनी काठमांडू महानगरपालिकेतर्फे सुमारे २३ अब्ज नेपाळी रुपये किमतीची सार्वजनिक जमीन अतिक्रमणमुक्त केली. या जमिनीचा वापर आता उद्यानं आणि क्रीडांगणांसाठी केला जात आहे.

मध्यमवर्गीय प्रतिमा आणि साधेपणा

नुकत्याच व्हायरल झालेल्या एका व्हिडिओमध्ये बालेन शाह ४ कोटी नेपाळी रुपये किमतीची 'लँड रोव्हर डिफेंडर' गाडी चालवताना दिसले होते, मात्र ती त्यांची खाजगी मालमत्ता आहे की नाही याची अद्याप पुष्टी झालेली नाही. नेपाळमधील इतर राजकीय नेत्यांच्या तुलनेत बालेन शाह यांची संपत्ती मध्यमवर्गीय श्रेणीत येते. तरुणांसाठी ते श्रीमंतीचे नव्हे, तर 'बदलाचे' प्रतीक मानले जातात. जर आगामी काळात आरएसपीचे (RSP) सरकार आलं, तर बालेन यांचे लक्ष वैयक्तिक संपत्तीपेक्षा धोरणात्मक बदलांवर अधिक असेल, असं मानलं जात आहे.