Share Market : डोनाल्ड ट्रम्प यांच्या टॅरिफनंतर भारतीय शेअर बाजारात मोठी घसरण झाली होती. परदेशी गुंतवणूकदारांची विक्री याला जास्त कारणीभूत ठरली. पण, टॅरिफला ९० दिवसांची स्थगिती मिळाल्यानंतर परिस्थिती बदलत चालली आहे. भारतीय शेअर बाजारात परदेशी गुंतवणूकदारांचा पुन्हा रस वाढला आहे. ते शेअर बाजारात जोमाने गुंतवणूक करत आहेत. गेल्या आठवड्यात परदेशी गुंतवणूकदारांनी शेअर बाजारात १७,४२५ कोटी रुपयांची गुंतवणूक केली. वृत्तसंस्था पीटीआयच्या वृत्तानुसार, १८ एप्रिल रोजी संपलेल्या आठवड्यात ८,५०० कोटी रुपयांची निव्वळ गुंतवणूक झाली होती.
परदेशी गुंतवणूकदारांचा आत्मविश्वास का परतला?जागतिक स्तरावर, प्रमुख बाजारपेठांची स्थिर कामगिरी, अमेरिकन फेडरल रिझर्व्हकडून व्याजदर वाढवण्याबाबत अपेक्षा आणि स्थिर अमेरिकन डॉलरमुळे भारतासारख्या उदयोन्मुख बाजारपेठांसाठी जोखीम घेण्याची क्षमता वाढली आहे. तसेच टॅरिफला स्थगिती मिळाल्यानंतर शेअर बाजाराने वेग पकडला आहे. या सर्वांसोबतच, जागतिक व्यापारातील तणाव कमी झाल्यामुळे गुंतवणूकदारांच्या भावनांमध्येही सुधारणा झाली आहे. देशांतर्गत आघाडीवर, भारताचा मजबूत विकासाचा अंदाज, महागाई कमी होणे आणि २०२५ मध्ये सामान्यपेक्षा जास्त मान्सूनचा अंदाज यामुळे गुंतवणूकदारांचा बाजारावरील विश्वास वाढला आहे. यामुळे, परदेशी गुंतवणूकदार आकर्षित झाले.
परदेशी गुंतवणूकदारांनी किती पैसे काढले?डिपॉझिटरी डेटानुसार, एप्रिलमध्ये आतापर्यंत एफपीआयनी इक्विटीजमधून ५,६७८ कोटी रुपये काढले आहेत, ज्यामुळे २०२५ मधील एकूण पैसे काढण्याची रक्कम १.२२ लाख कोटी रुपये झाली आहे. अमेरिकेच्या टॅरिफ धोरणामुळे जागतिक अनिश्चितता असल्याने महिन्याच्या सुरुवातीला परदेशी गुंतवणूकदारांनी मोठ्या प्रमाणात शेअर्सची विक्री केली होती.
वाचा - वंदे भारत आणि शताब्दी एक्सप्रेस गाड्यांचा खरा मालक कोण? अनेकांच्या मनात गैरसमज
परदेशी गुंतवणूकदारांचा रस का वाढला?भारतीय शेअर बाजारांमध्ये परदेशी गुंतवणूकदारांच्या नव्याने रस निर्माण होण्याची २ मुख्य कारणे अर्थतज्ज्ञांनी सांगितली. पहिले कारण म्हणजे अमेरिकन डॉलरमधील घसरण आणि दुसरे कारण म्हणजे अमेरिकन वाढीमध्ये तीव्र घट होण्याची अपेक्षा, ज्यामुळे कॉर्पोरेट कमाईवर परिणाम होईल. जानेवारी २०२५ च्या मध्यात डॉलर निर्देशांक १११ च्या शिखरावरून घसरून आता ९९ च्या आसपास पोहोचला आहे. त्याच वेळी, भारताची अर्थव्यवस्था लवचिक राहू शकते, वाढ ६ टक्क्यांहून अधिक राहण्याची अपेक्षा आहे. त्यामुळे कॉर्पोरेट उत्पन्नातही सुधारणा होण्याची अपेक्षा आहे.