oyo ritesh agarwal : हॉटेलमध्ये रूम बुकिंग म्हटलं की 'ओयो' हे नाव पहिल्यांदा ओठांवर येते. गेल्या काही काळापासून ओयो हॉटेल कुठल्या ना कुठल्या कारणांमुळे सतत चर्चेत आहे. कधी आधार कार्डद्वारे बुकिंग असो किंवा काही शहरांमध्ये जोडप्यांच्या प्रवेशावर बंदी असो. हॉस्पिटॅलिटी इंडस्ट्रीची ही हॉटेल साखळी चर्चेत येत राहते. आता पुन्हा एकदा ओयो चर्चेत आलं आहे. पण, यावेळी कारण वेगळं आहे. ओयोवर बनावट बुकिंगच्या नावाखाली पैसे कमावल्याचा आरोप आहे. कंपनीचे मालक रितेश अग्रवाल यांच्याविरुद्ध २२ कोटी रुपयांच्या फसवणुकीचा गुन्हा दाखल करण्यात आला आहे.
राजस्थानमधील जयपूरमधील काही हॉटेल मालकांनी ओयोवर फसवणुकीचा आरोप केला आहे. ओयोने त्यांच्या हॉटेल्समध्ये बनावट बुकिंग करून पैसे कमावल्याचा आरोप आहे. ओयोने चुकीच्या पद्धतीने हॉटेल्स बुक करून आपले उत्पन्न वाढवले आहे, ज्यामुळे हॉटेल्सना जीएसटी विभागाकडून कोट्यवधी रुपयांचा कर वसुली आणि दंड सहन करावा लागत आहे.
२२ कोटींच्या फसवणुकीचा आरोपहॉटेल फेडरेशन ऑफ राजस्थानचे अध्यक्ष हुसेन खान यांनी या प्रकरणावर चिंता व्यक्त केली आहे. हॉटेल मालकांसाठी ही एक मोठी समस्या असल्याचे त्यांनी म्हटलं आहे. ओयोचे संस्थापक रितेश अग्रवाल यांच्यावर एका हॉटेल ऑपरेटरने २२ कोटी रुपयांच्या फसवणुकीचा आरोप केला आहे. तसेच एफआयआर देखील नोंदवण्यात आला आहे. जोधपूरमधील १० हून अधिक हॉटेल मालकांना राज्य जीएसटी आणि केंद्रीय जीएसटीची नोटीस मिळाली आहे. काही लोकांना १ कोटी रुपयांपेक्षा जास्त पैसे द्यावे लागतात.
कशी होते फसवणूक?हॉटेल मालकांचा आरोप आहे की हॉटेल्स प्रथम ओयोद्वारे ऑनलाइन बुक केली जातात आणि नंतर काही काळानंतर रद्द केली जातात. यासाठी जीएसटी शुल्क आकारले जाते, जे हॉटेल मालकांना आपल्या खिशातून द्यावे लागते.
वाचा - मेहुल चोक्सीकडून आतापर्यंत किती वसूल केले? ईडीच्या चौकशीतून धक्कादायक माहिती समोर
हॉटेल साखळी कधी सुरू झाली?ओयो हे हॉस्पिटॅलिटी उद्योगातील एक मोठे नाव आहे. रितेश अग्रवाल यांनी २०१३ मध्ये याची सुरुवात केली. त्यानंतर कंपनीचा व्यवसाय वाढतच गेला आणि आज ओयोचा जगभरातील ८० हून अधिक देशांमध्ये व्यवसाय आहे.