Alakh Pandey Physicswallah Success Story: एक-दोन दिवस, एक-दोन महिन्यांत कोणतंही यश मिळत नाही. यशस्वी व्यक्तीच्या मागे त्याचं समर्पण, परिश्रम आणि संयम असतो. यशाच्या मार्गावर अनेक धोकादायक टप्पेही येत असतात. अनेक संघर्ष असतात. या सर्वातून बाहेर पडल्यानंतर यशाची चव चाखायला मिळते. अशीच एक व्यक्ती म्हणजे एज्युटेक कंपनी फिजिक्सवालाचे संस्थापक अलख पांडे. एकेकाळी दरमहा ५,००० रुपये काम करणारे अलख आता हजारो कोटींच्या कंपनीचे मालक आहेत. अलख सध्या चर्चेत आहेत कारण त्यांची कंपनी फिजिक्सवाला ३,८२० कोटी रुपयांचा आयपीओ घेऊन येत आहे.
अलख पांडे यांनी शालेय शिक्षण पूर्ण केल्यानंतर कानपूरच्या अभियांत्रिकी महाविद्यालयात प्रवेश घेतला. त्यांनी आपलं शिक्षण अर्धवट सोडलं आणि प्रयागराज ( तत्कालिन अलाहाबाद) येथे परतले. प्रयागराजमध्ये आल्यानंतर त्यांनी शिकवण्याची आवड कायम ठेवली आणि कोचिंगमध्ये शिकवायला सुरुवात केली. यासाठी त्यांना ५,००० रुपये मिळत असत. आज त्यांची कंपनी देशाची युनिकॉर्न बनली आहे. युनिकॉर्नला अशी कंपनी म्हणतात जिची मार्केट कॅप १ अब्ज डॉलरपेक्षा जास्त आहे.
आता जुनी कार चालवणं होणार महाग, फिटनेस टेस्टच्या नावाखाली खिसे कापायची तयारी
अलख यांना अभिनेता व्हायचं होतं
अलख पांडे यांना लहानपणीपासूनच अभिनेता व्हायचं होतं. शाळा-कॉलेजांमध्ये पथनाट्ये सादर करणाऱ्या अलख यांनी आठव्या इयत्तेपासून शिकवणी शिकवायला सुरुवात केली. मग ते चौथीच्या मुलांना शिकवणी शिकवत असत. अकरावीत शिकत असताना त्यांनी नववीच्या मुलांना शिकवणी शिकवली. अलख यांनी हायस्कूलमध्ये ९१ टक्के आणि इंटरमीडिएटमध्ये ९३.५ टक्के गुण मिळवले. घरच्या आर्थिक चणचणीमुळे त्यांनी अभ्यासाबरोबरच कोचिंगमध्येही शिकवण्यास करण्यास सुरुवात केली. परिस्थिती अशी होती की वडील सतीश पांडे आणि आई रजत पांडे यांनी मुलगा अलख आणि मुलगी अदिती यांना शिकवण्यासाठी घर विकलं.
फिजिक्सवालाची सुरुवात कशी झाली?
अलख यांनी २०१० मध्ये बिशप जॉन्सन स्कूल अँड कॉलेजमधून १२ वी चं शिक्षण पूर्ण केले. यानंतर त्याला एचबीटीआय कानपूरमध्ये बीटेकमध्ये दाखल करण्यात आले. अलख यांनी २०१५ मध्ये एचबीटीआय कानपूर येथून बीटेक पूर्ण केलं आणि त्याच संस्थेत शिकवायला सुरुवात केली. त्यांनी आपल्या लेक्चरचे व्हिडिओ यूट्यूबवर अपलोड करायला सुरुवात केली. अशा प्रकारे २०१७ मध्ये 'फिजिक्सवाला' यूट्यूब चॅनेल म्हणून सुरू झालं. स्पर्धा परीक्षांची तयारी करणाऱ्यांना ही गोष्ट खूप आवडली. जेव्हा यूट्यूबवर व्ह्यूज आणि सब्स्क्रायबर्स वाढू लागले, तेव्हा त्यांनी लेक्चर व्हिडिओ बनवण्यावर आणि ते अपलोड करण्यावर भर देण्यास सुरुवात केली.
किंमत ४० हजार कोटींपेक्षा जास्त
२०२० मध्ये फिजिक्सवालाची कंपनी कायद्यांतर्गत अलख पांडे यांनी नोंदणी केली होती. त्यांचं चॅनेल आता एक कंपनी बनली. त्यांच्यासोबत आयआयटी बीएचयूमधील अभियांत्रिकीचा विद्यार्थी प्रतीक माहेश्वरी देखील होता. प्रतीकनं जेव्हा या व्यवसायाची सूत्रे हाती घेतली, तेव्हा अलख पूर्णपणे शिक्षणाकडे वळले होते. यानंतर कंपनीची लोकप्रियता वाढली. आयपीओनंतर फिजिक्सवालाचे व्हॅल्यूएशन सुमारे ५ अब्ज डॉलर (सुमारे ४४,००० कोटी रुपये) होईल.
आयपीओची तयारी
फिजिक्सवाला आता शेअर बाजारात येत आहे. आयपीओच्या माध्यमातून कंपनीला ३,८२० कोटी रुपये उभे करायचे आहेत. कंपनीनं सेबीला आयपीओशी संबंधित आवश्यक अपडेट्स दिले आहेत. या पैशाचा वापर कंपनी आपला व्यवसाय वाढविण्यासाठी करणार आहे. आयपीओमध्ये दोन प्रकारचे शेअर्स असतील. ३,१०० कोटी रुपयांचे नवीन शेअर्स जारी केले जातील. त्याच वेळी, कंपनीच्या मालकांकडून ७२० कोटी रुपयांचे शेअर्स विकले जातील. कंपनीचे मालक अलख पांडे आणि प्रतीक माहेश्वरी (अधिकृत कागदपत्रांमध्ये प्रतीक बूब) प्रत्येकी ३६० कोटी रुपयांचे शेअर्स विकतील.