ITR Filing : जर तुम्ही नोकरदार असाल आणि आर्थिक वर्ष २०२४-२५ साठी आयकर रिटर्न (ITR) भरत असाल, तर ही बातमी तुमच्यासाठी अत्यंत महत्त्वाची आहे! आयकर विभागाने ITR दाखल करण्याची अंतिम मुदत ३१ जुलैवरून वाढवून १५ सप्टेंबर केली आहे. पण, घाईगडबडीत काही छोट्या चुका केल्यास तुमचा रिफंड (परतावा) अडकू शकतो आणि तुम्हाला अडचणींचा सामना करावा लागू शकतो. १५ जूनपर्यंत फॉर्म-१६ मिळाल्यानंतर अनेकांनी रिटर्न भरणं सुरू केलं आहे, पण चुका टाळणं गरजेचं आहे.
तुमचा रिफंड का अडकतो? 'या' सामान्य चुका टाळा!आयटीआर भरल्यानंतर तुम्ही रिफंडची वाट पाहत असाल, तर तुमच्या परताव्याला विलंब होण्याची अनेक कारणे असू शकतात. खालील चुकांमुळे तुमचा रिफंड अडकू शकतो.
- बँक खाते लिंक केलेले नाही: तुमच्या आयकर प्रोफाइलमध्ये जर कोणतेही सक्रिय बँक खाते लिंक केलेले नसेल, तर परतावा हस्तांतरित केला जाणार नाही. हे सर्वात सामान्य कारण आहे.
- बँक खाते प्रमाणित नाही: बँक खाते जोडल्यानंतर, तुम्हाला ते प्रमाणीकरण (validate) करणे आवश्यक आहे. जर तुम्ही ते प्रमाणित केले नाही, तर तुमचा परतावा अडकण्याची शक्यता आहे.
बँक खाते कसे जोडायचे/प्रमाणित करायचे?
- प्रथम आयकर पोर्टलवर (e-filing portal) लॉगिन करा.
- तुमच्या प्रोफाइलवर जाऊन 'बँक खाते जोडा' (Add Bank Account) पर्याय निवडा.
- खाते क्रमांक, IFSC कोड आणि खात्याचा प्रकार यांसारखे तपशील योग्यरित्या भरा.
- नंतर 'प्रमाणीकरण' (Validate) करून ते सत्यापित करा.
- जर तुमचे बँक खाते आधीच लिंक असेल आणि ते अपडेट करायचे असेल, तर तपशिलांमध्ये जाऊन ते अद्ययावत करून पुन्हा सत्यापित करा.
TDS जुळत नाही: तुमच्या फॉर्म २६एएस (Form 26AS) मध्ये दर्शविलेल्या TDS (Tax Deducted at Source) पेक्षा कमी टीडीएस जर तुम्ही तुमच्या रिटर्नमध्ये दाखवला असेल, तर तुमचा परतावा थांबवला जाऊ शकतो. नेहमी फॉर्म २६एएस मधील माहितीशी टीडीएस जुळवून घ्या.
चुकीचा कपातीचा दावा: जर तुम्ही आयकर कायद्याच्या कलम ८०सी (80C), ८०डी (80D) इत्यादी अंतर्गत आवश्यकतेपेक्षा जास्त कपातीचा (deduction) दावा केला असेल, तर तुम्हाला आयकर विभागाकडून नोटीस येऊ शकते आणि तुमचा परतावा अडकू शकतो.
गणनेमध्ये चूक: तुमचे उत्पन्न किंवा कराची गणना करताना मॅन्युअल नोंदीमध्ये चूक झाल्यास तुमचा परतावा अडकू शकतो. त्यामुळे, आकडेमोड काळजीपूर्वक करा.
वाचा - इराण-इस्रायल युद्धातही भारताची 'स्मार्ट' चाल! रशियाच्या सहकार्याने कच्च्या तेलाचं गणित बदललं
एकंदरीत, जर तुम्हाला तुमच्या खात्यात लवकर परतावा हवा असेल, तर तुम्ही योग्य बँक खाते जोडणे आणि सर्व माहिती योग्यरित्या आणि अचूकपणे भरणे महत्त्वाचे आहे. आयटीआर दाखल करण्यापूर्वी, तुमच्या फॉर्म २६एएस आणि एआयएस (Annual Information Statement - AIS) अहवालातील टीडीएस आणि उत्पन्न जुळते का, हे तपासा. यामुळे तुमचा परतावा वेळेवर मिळेल आणि कोणतीही अडचण येणार नाही.