पर्सनल लोनसाठी 'ही' बँक देतेय सर्वात स्वस्त कर्ज; पाहा 'एसबीआय'सह ८ मोठ्या बँकांचे व्याजदर आणि प्रोसेसिंग फी

Personal Loan : जर तुम्ही देखील वैयक्तिक कर्ज घेण्याचा विचार करत असाल, तर विविध बँका कोणत्या व्याजदराने कर्जे देत आहेत, हे सर्वप्रथम समजून घेणे अत्यंत महत्त्वाचे आहे.

Personal Loan : आर्थिक गरजांसाठी 'पर्सनल लोन' घेणाऱ्यांची संख्या सध्या मोठ्या प्रमाणावर वाढत आहे. मात्र, कर्ज घेण्यापूर्वी विविध बँकांच्या व्याजदरांची तुलना करणे अत्यंत आवश्यक आहे. मार्च २०२६ च्या आकडेवारीनुसार, देशातील प्रमुख बँकांचे व्याजदर ८.७५% ते १८.००% या दरम्यान आहेत. तुमचा सिबिल स्कोर, उत्पन्नाचे साधन आणि आर्थिक पार्श्वभूमी यावर बँका तुम्हाला किती दराने कर्ज द्यायचे हे ठरवतात. योग्य बँकेची निवड केल्यास तुम्ही दरमहा हजारो रुपयांची बचत करू शकता.

प्रमुख बँकांचे व्याजदर आणि प्रोसेसिंग फी (मार्च २०२६)

येथे देशातील टॉप ८ बँकांच्या ताज्या दरांची तुलना दिली आहे

बँक	व्याजदर (वार्षिक)	प्रोसेसिंग फी (रुपये)
युनियन बँक ऑफ इंडिया	८.७५% - १२.५५%	कर्जाच्या १% (जास्तीत जास्त ७,५००)
कॅनरा बँक	९.७०% - १५.१५%	०.५% (१,००० ते ५,०००)
HDFC बँक	९.९९% पासून सुरू	६,५०० पर्यंत
ICICI बँक	९.९९% पासून सुरू	कर्जाच्या २% पर्यंत
भारतीय स्टेट बँक	१०.००% - १५.००%	१.५% (१,००० ते १५,०००)
बँक ऑफ बडोदा	१०.१५% - १८.००%	२% पर्यंत (जास्तीत जास्त १०,०००)
कोटक महिंद्रा बँक	१०.९९% पासून सुरू	५% पर्यंत
फेडरल बँक	११.७५% - १८.९९%	३% पर्यंत

कर्जासाठी अर्ज करण्यापूर्वी 'या' ५ गोष्टी लक्षात ठेवा

1. व्याजदरांची तुलना : अर्धा किंवा एक टक्का व्याजाचा फरकही तुमच्या खिशावर मोठा परिणाम करू शकतो. किमान ३-४ बँकांच्या दरांची तुलना 'ईएमआय कॅल्क्युलेटर'वर करून पहा.
2. प्रोसेसिंग फीचा भार : अनेकदा बँका व्याजदर कमी दाखवतात, पण 'फाईल चार्जेस' किंवा प्रोसेसिंग फी जास्त आकारतात. कर्जाची एकूण रक्कम आणि हातातील प्रत्यक्ष रक्कम यात किती तफावत आहे, हे तपासा.
3. कालावधीची निवड : कर्जाचा कालावधी जितका जास्त, तितका ईएमआय कमी असेल; पण लक्षात ठेवा, दीर्घ कालावधीत तुम्हाला एकूण व्याजापोटी मोठी रक्कम मोजावी लागेल.
4. सिबिल स्कोर : तुमचा स्कोर ७५० पेक्षा जास्त असेल, तर तुम्ही बँकेसोबत घासाघीस करून व्याजदर कमी करून घेऊ शकता. उत्तम सिबिल असेल तर बँका प्रोसेसिंग फीमध्येही सवलत देतात.

वाचा - युद्धामुळे भारतीय शेतकरी चिंतेत! LPG नंतर आता देशासमोर आणखी एक संकट; आगामी खरीप हंगामाला फटका?

1. छुपे खर्च : मुदतीपूर्वी कर्ज बंद केल्यास किती दंड लागेल किंवा हप्ता उशिरा भरल्यास किती दंड आकारला जाईल, याची माहिती आधीच करून घ्या.