ज्वारी - कणसातील अळ्यांचे नियंत्रण, मका - फुलोऱ्यात असल्याने सिंचन पुरवठा कसा कराल? 

Agriculture News :    रब्बी हंगामातील ज्वारी आणि मका पीक वाढीच्या अवस्थेत असून या काळात या दोन्ही पिकांचे व्यवस्थापन कसे करावे, फवारण्या काय कराव्यात, सिंचन सुविधा कशी करावी, याबाबत माहिती घेऊयात... 

रब्बी ज्वारी

• ज्वारी पीक कणसांमध्ये दाणे भरण्याची अवस्थेत आहे. अशावेळी काय काळजी घ्यावी, हे पाहुयात... 
• ज्वारी पिकाच्या फुलोरा ते दाणे पक्व होण्याच्या अवस्थेत कणसातील अळ्या या किडीचा प्रादुर्भाव होण्याची शक्यता असते. 
• तसेच प्रादुर्भाव जास्त असल्यास झाड वाळते. 
• अळ्या दुधाळ अवस्थेतील दाणे खातात. विष्ठेमुळे दाण्याची प्रत खराब होते. 
• म्हणून २० अळ्या प्रति कणीस आढळल्यास, नियंत्रणासाठी क्विनॉलफॉस २५ ईसी २ मिली प्रति लिटर पाणी मिसळून याप्रमाणे फवारणी करावी.
• पहिला पंधरवडा - पक्ष्यांपासून संरक्षण करावे (पक्षीथांबे /मचाण बसविणे).

रब्बी मकामका पीक तुरे लागण्याच्या अवस्थेत असून या काळात पाणी देण्याचं नियोजन व्यवस्थित करता आले पाहिजे. ते कसं करायचं, समजून घेऊयात... 

सिंचन

• मक्याची पाने रुंद व लांब असतात. बाष्पीभवन क्रियेमुळे पानांतून अधिक पाणी बाहेर टाकले जात असल्याने या पिकास पाण्याची गरज अधिक असते. 
• मका पीक पाण्याच्या ताणास संपूर्ण कालावधीमध्ये संवेदनशील आहे. 
• संवेदनशील अवस्थांच्या वेळी पाण्याचा ताण पडू देऊ नये, अन्यथा उत्पादनात लक्षणीय घट येते. 
• पीक फुलोऱ्यात आणि दाणे भरत असताना कमी अंतराने भरपूर पाणी द्यावे. 
• म्हणजे कणसे भरण्यास मदत होते. 
• मका फुलोऱ्यात असताना जमिनीत पाण्याचे प्रमाण कमी असल्यास स्त्रीकेसर बाहेर पडण्यास उशीर झाल्यामुळे बीजधारणा कमी होऊन उत्पादन घटते. 
• म्हणून पीक तुऱ्यावर आणि स्त्रीकेसर अवस्थेत असताना पाण्याची आवश्यकता अधिक असते.

- ग्रामीण कृषी मौसम सेवा आणि विभागीय संशोधन सेवा केंद्र, इगतपुरी