Wheat Market : परतीच्या पावसाने खेळ बदलला; गहू कोसळणार की उसळी मारणार? वाचा सविस्तर

Wheat Market : बाजारात नवीन गव्हाची आवक सुरू झाली असून पुढील महिन्यात राशींना वेग येणार आहे. उत्पादन वाढण्याची शक्यता असल्याने गव्हाचे दर कोसळणार की उसळी मारणार? जाणून घ्या सविस्तर (Wheat Market)

Wheat Market : महाशिवरात्रीनंतर गव्हाच्या राशींना सुरुवात होते आणि यंदाही बाजारात नव्या गव्हाची आवक सुरू झाली आहे. (Wheat Market)

पुढील महिन्यात गव्हाची आवक वेग घेण्याची शक्यता असून दराबाबत उत्सुकता वाढली आहे. व्यापाऱ्यांच्या अंदाजानुसार, उत्पादन वाढल्यास गव्हाचे दर काहीसे मवाळ राहू शकतात, तर ज्वारीचे उत्पादन घटल्याने तिचे भाव चढे राहण्याची शक्यता आहे.(Wheat Market)

परतीच्या पावसाचा गव्हाला मोठा फायदा

यंदा तालुक्यात सरासरीपेक्षा अधिक पाऊस झाल्याने रब्बी पिकांना चांगला आधार मिळाला. विशेषतः गव्हाच्या पिकाला पोषक वातावरण लाभल्याने उत्पादन वाढण्याची आशा व्यक्त केली जात आहे. बहुतांश शेतकऱ्यांनी सोयाबीननंतर गव्हाचा पेरा वाढवला आहे.

आधुनिक तंत्रज्ञान, मिश्र खतांचा वापर आणि निसर्गाची साथ यामुळे गव्हाची उत्पादकता वाढेल, असे कृषी तज्ज्ञांचे मत आहे.

हमीभाव आणि निर्यात निर्णय

केंद्र सरकारने यंदा गव्हासाठी २ हजार ६०० रुपये प्रति क्विंटल असा हमीभाव जाहीर केला आहे. तसेच देशात गव्हाचे उत्पादन सरासरीपेक्षा जास्त होईल, असा अंदाज व्यक्त करत २५ लाख टन गहू निर्यातीस मंजुरी दिल्याची माहिती व्यापाऱ्यांनी दिली.

उत्पादन वाढल्यास बाजारातील पुरवठा वाढेल आणि दरांवर दबाव येऊ शकतो, असा अंदाज व्यक्त केला जात आहे.

सध्या बाजारातील दर किती?

सध्या स्थानिक अडत बाजारात गव्हाची आवक मर्यादित आहे. परराज्यातील जुन्या गव्हाची आवक सुरू असून प्रतवारीनुसार दर ठरतो.

२ हजार ५०० ते ३ हजार ५०० रुपये प्रति क्विंटल असा दर सध्या मिळत आहे.

गव्हाची स्वच्छता, दाण्याचा आकार आणि पॅकिंगनुसार भाव वाढतो.

व्यापाऱ्यांच्या म्हणण्यानुसार, पुढील महिन्यात स्थानिक गव्हाची आवक वाढल्यास दरात चढ-उतार होऊ शकतात.

ज्वारीचे उत्पादन घटण्याची शक्यता

यंदा परतीच्या पावसामुळे काही भागात रब्बी ज्वारीचे नुकसान झाले आहे. त्यामुळे उत्पादन घटण्याची शक्यता शेतकरी व्यक्त करत आहेत.

सध्या बाजारात ज्वारीला ४ हजार ५०० ते ७ हजार रुपये प्रति क्विंटल असा दर मिळत आहे. शेजारच्या कर्नाटकातून दरवर्षी ज्वारीची आवक होत असली तरी स्थानिक उत्पादन घटल्यास दर अधिक वाढू शकतात.

शेतकऱ्यांची भूमिका

काही शेतकऱ्यांनी यंदा घरापुरता गहू न घेता विक्रीसाठीही लागवड वाढवली आहे. परतीच्या पावसामुळे गव्हाला फायदा झाला असला तरी ज्वारीचे क्षेत्र घटल्याने तिची आवक कमी राहण्याची भीती आहे.

यंदा गव्हाचे उत्पादन वाढण्याची शक्यता असल्याने दर मवाळ राहू शकतात; मात्र ज्वारीचे उत्पादन घटल्यास तिच्या भावात तेजी कायम राहण्याची शक्यता आहे. पुढील महिन्यात वाढणारी आवक आणि बाजारातील मागणी यावरच अंतिम दराचे चित्र स्पष्ट होणार आहे.

दरम्यान, ज्वारीचे उत्पादन घटण्याची भीती व्यक्त होत असल्याने तिचे भाव ७ हजारांच्या घरात पोहोचले आहेत.

केंद्र सरकारने २,६०० रुपये हमीभाव जाहीर करत २५ लाख टन निर्यातीस मंजुरी दिल्याने बाजाराचे गणित अधिकच रंगले आहे. पुढील काही आठवडे दरासाठी निर्णायक ठरणार आहेत.

हे ही वाचा सविस्तर : Tur Kharedi : हमीभाव जाहीर, तरी केंद्रांवर आवक कमी; तूर खरेदीत अडथळा कुठे? वाचा सविस्तर

अधिक वाचा : Sugarcane Crushing : वसमतमध्ये गाळप अंतिम टप्प्यात; कोणत्या कारखान्याने किती गाळप केले?