Soybean Market : सोयाबीनची आवक घटली; बाजार समितीवरील ताण हलका वाचा सविस्तर

Soybean Market : सोयाबीनच्या दरांनी घेतलेला अचानक कलाटणी घेतली आहे. उच्च दर, मोठी आवक आणि गर्दी या सगळ्याला आता ब्रेक लागला आहे. आवक घटली आणि बिजवाईचे दर मोठ्या प्रमाणात कोसळले.(Soybean Market)

सलग महिनाभर वाशिम कृषी उत्पन्न बाजार समितीत सोयाबीनची आवक दिवसाला १२ ते २० हजार क्विंटलपर्यंत होत होती. उच्च दर आणि उत्पादनाची वाढती मागणी पाहून राज्यातील विविध जिल्ह्यांमधील शेतकरी आपला माल घेऊन वाशिमकडे मोठ्या प्रमाणावर धाव घेत होते.(Soybean Market)

मात्र, गेल्या तीन ते चार दिवसांत परिस्थितीत मोठा बदल दिसून येत असून सोयाबीनची आवक लक्षणीयरीत्या घटली आहे. याचबरोबर बिजवाई सोयाबीनच्या दरातही विक्रमी घसरण झाली आहे.(Soybean Market)

दर वाढले, आवक वाढली

नोव्हेंबरच्या पहिल्या आठवड्यात वाशिम बाजार समितीत बिजवाई सोयाबीनचा उत्कृष्ट माल तब्बल ८ हजार ५०० प्रतिक्विंटल दराने विक्रीला लागला. ही बातमी राज्यभर झपाट्याने पसरताच अकोला, हिंगोली, बुलढाणा, अमरावतीसह अनेक जिल्ह्यांमधील शेतकऱ्यांनी वाशिम बाजार समितीकडे धाव घेतली.

या वाढत्या गर्दीमुळे बाजार समितीच्या आवारात जागा कमी पडू लागली, तर रस्त्याच्या दोन्ही बाजूंना दोन किलोमीटरपर्यंत सोयाबीनने भरलेली वाहने रांगेत उभी राहण्याची वेळ आली.

२९ नोव्हेंबरला फक्त ६ हजार क्विंटल आवक

गेल्या आठवड्याभरात आवक सातत्याने कमी होत गेली.

२९ नोव्हेंबर रोजी तर केवळ ६,००० क्विंटल सोयाबीनचीच नोंद झाली.

यामुळे बाजार समिती प्रशासनावरील ताण मोठ्या प्रमाणात हलका झाला आहे.

'बिजवाई'च्या दरात मोठी पडझड

महिन्याच्या सुरुवातीला तेजीत असलेले दर आता कोसळले आहेत. ८ हजार ५०० रुपयांवर पोहोचलेले बिजवाईचे प्रतिक्विंटल दर २९ नोव्हेंबर रोजी ४ हजार ५४० ते ५ हजार २०१ रुपये इतकेच राहिले. दरातील ही जवळपास ३ हजार ५०० रुपयांची घसरण शेतकऱ्यांसाठी मोठा धक्का मानला जात आहे.

आवक घटण्याची कारणे काय?

शेतकऱ्यांनी मोठ्या प्रमाणात विक्री केल्याने शेतातील माल कमी झाला.

दर घसरू लागल्याचे संकेत मिळाल्यानंतर काही शेतकऱ्यांनी विक्री थांबवली.

बाहेरील जिल्ह्यांमधील मालाची वाहतूकही कमी झाली.

हवामान स्थिर आणि कोरडे असल्याने शेतात वाळवणाची प्रक्रिया सुरू ठेवण्याची शक्यता.

शेतकऱ्यांची चिंता वाढली

दरात आलेल्या घटीमुळे शेतकऱ्यांमध्ये संभ्रम निर्माण झाला आहे.

उच्च दराच्या अपेक्षेने काहींनी माल रोखून ठेवला होता; मात्र महिनाअखेरीस दर अचानकपणे घसरल्याने त्यांचे नियोजन कोलमडले.

आवक कमी झाल्याने ताण काही प्रमाणात कमी झाला आहे. मात्र, दरातील घसरण ही मागणी-पुरवठा तत्त्वानुसारच झाली आहे. पुढील काही दिवस बाजार स्थिर राहण्याची शक्यता आहे, असे बाजार समिती प्रशासनाने कळवले आहे. 

हे ही वाचा सविस्तर : Washim APMC : वाशिम बाजार 'हाऊसफुल'; सोयाबीन–हळदीची सर्वाधिक दैनंदिन आवक