Agriculture News : राज्यातील प्रयोगशील शेतकऱ्यांना 'कृषी संशोधक' (Agricultural Researcher) म्हणून मान्यता देण्याची योजना लवकरच राबविण्यात येणार असल्याची घोषणा मुख्यमंत्री देवेंद्र फडणवीस (Chief Minister Devendra Fadnavis) यांनी केली.
परभणीत सुरू झालेल्या ५३व्या संयुक्त कृषी संशोधन व विकास समितीच्या बैठकीत ते बोलत होते. या बैठकीत 'विकसित कृषी संकल्प अभियान' या नव्या उपक्रमाचीही सुरुवात करण्यात आली.
शाश्वत शेतीसाठी केवळ प्रयोगशाळेत नव्हे, तर शेतात प्रयोग करणाऱ्या शेतकऱ्यांचा सन्मानही तितकाच महत्त्वाचा आहे. त्यामुळे राज्यातील चारही कृषी विद्यापीठांनी पुढाकार घेत, दरवर्षी १० शेतकऱ्यांना 'कृषी संशोधक' (Agricultural Researcher) म्हणून विद्यापीठातर्फे मानद पदवी देण्याची योजना राबवण्याचे निर्देश मुख्यमंत्री देवेंद्र फडणवीस यांनी दिले.
शेतीसाठी प्रयोगशीलतेला मान्यता
मुख्यमंत्री फडणवीस यांनी सांगितले की, फक्त प्रयोगशाळेतील संशोधन पुरेसे नाही. शेतात प्रत्यक्ष प्रयोग करणारे शेतकरीही कृषी विकासाचे महत्त्वाचे आधारस्तंभ आहेत. त्यामुळे राज्यातील सर्व चार कृषी विद्यापीठांनी दरवर्षी १० प्रयोगशील शेतकऱ्यांना 'कृषी संशोधक' म्हणून मानद पदवी देण्याची योजना राबवावी, असे निर्देश त्यांनी विद्यापीठांना दिले.
अल्पभूधारकांसाठी तंत्रज्ञान महत्त्वाचे
मुख्यमंत्र्यांनी शेतीतील बदलत्या हवामानाचे आव्हान ओळखून 'प्रोटेक्टिव्ह फार्मिंग' (संरक्षक शेती) धोरणांची गरज अधोरेखित केली.ते म्हणाले, 'राज्यातील ७९% शेतकरी हे अल्पभूधारक असून, त्यांच्यासाठी तणाव सहन करणाऱ्या व रोगप्रतिकारक वाणांचे संशोधन अत्यावश्यक आहे.'
बीबीएफ (Broad Bed Furrow) लागवड तंत्रज्ञान, मृद व्यवस्थापन, जलसंवर्धन आदी बाबींचे महत्त्व त्यांनी स्पष्ट केले.
डिजिटल शेतीचे युग : एआय आणि ड्रोन तंत्रज्ञानावर भर
मुख्यमंत्री फडणवीस यांनी कृषी क्षेत्रात कृत्रिम बुद्धिमत्ता (AI) आणि ड्रोन तंत्रज्ञान यांचा वापर वाढवण्याची गरज आहे. त्यांनी पुढे सांगितले की, ऊस उत्पादनात AI चा वापर केल्याने लक्षणीय वाढ झाली आहे. सर्व कृषी विद्यापीठांनी AI मिशन सुरू करावे.
हॉर्टिकल्चरमध्ये AI वापरासाठी ५०० कोटींची तरतूद अर्थसंकल्पात करण्यात आल्याचेही त्यांनी स्पष्ट केले. तसेच, शेतकऱ्यांसाठी ड्रोन वापर सुलभ व परवडणारा होण्यासाठी विशेष यंत्रणा उभारण्यात येणार आहे.
उद्घाटन सोहळ्याला मान्यवरांची उपस्थिती
या बैठकीच्या उद्घाटनप्रसंगी व्यासपीठावर कृषिमंत्री माणिकराव कोकाटे, पालकमंत्री मेघना बोर्डीकर, राज्यमंत्री आशिष जयस्वाल, खासदार संजय जाधव, आमदार राजेश विटेकर, डॉ. रत्नाकर गुट्टे, डॉ. राहुल पाटील, सतीश चव्हाण, जिल्हाधिकारी रघुनाथ गावडे, कुलगुरू इंद्र मणी, अधिष्ठाता डॉ. सदानंद भिसे, प्रवीण देशमुख आणि इतर मान्यवर उपस्थित होते.
'विकसित कृषी संकल्प अभियान'ची सुरुवात
या बैठकीत 'विकसित कृषी संकल्प अभियान' या महत्त्वाकांक्षी उपक्रमाचीही सुरुवात करण्यात आली. या उपक्रमाअंतर्गत शाश्वत शेतीसाठी संशोधन, प्रशिक्षण, आणि तंत्रज्ञान प्रसार या गोष्टींना गती मिळणार आहे.
नवीन दिशा : शेतकऱ्यांचा सन्मान आणि सशक्तीकरण
मुख्यमंत्री फडणवीस यांच्या घोषणेमुळे शेतकऱ्यांना केवळ लाभार्थी नव्हे, तर संशोधक म्हणून सन्मान मिळणार आहे. कृषी विद्यापीठे, संशोधक, आणि प्रयोगशील शेतकऱ्यांमधील समन्वयातून राज्यात शेतीला नवी दिशा मिळेल, असा विश्वास यावेळी व्यक्त करण्यात आला.