मुंबईत 'कोसळधार'! अनेक रस्त्यांवर साचले पाणी, लोकलसह विमानसेवेवरही परिणाम 

मुंबईसह राज्यात पावसाने जोर धरला आहे. मुंबईसह पूर्व आणि पश्चिम उपनगरात मुसळधार पावसामुळे अनेक रस्ते जलमय झाले आहेत. तसेच, लोकल ट्रेनवरही याचा परिणाम झाला आहे. अनेक ठिकाणी रेल्वे मार्गावर पाणी साचले आहे. याशिवाय, मुंबई छत्रपती शिवाजी महाराज आंतरराष्ट्रीय विमानतळावर सुद्धा पाणी साचल्यामुळे विमानसेवेवरही याचा परिणाम झाला आहे. 

ठळक मुद्दे काही भागांमध्ये अतिवृष्टी होण्याचा इशारा लोकलसह विमानसेवेवरही परिणाम गेल्या महिन्यातील 29 ऑगस्टच्या पावसात झालेलं हाल लक्षात घेता चाकरमान्यांनी घरची वाट धरली.

मुंबई, दि. 19 - मुंबईसह राज्यात पावसाने जोर धरला आहे. मुंबईसह पूर्व आणि पश्चिम उपनगरात मुसळधार पावसामुळे अनेक रस्ते जलमय झाले आहेत. तसेच, लोकल ट्रेनवरही याचा परिणाम झाला आहे. अनेक ठिकाणी रेल्वे मार्गावर पाणी साचले आहे. याशिवाय, मुंबई छत्रपती शिवाजी महाराज आंतरराष्ट्रीय विमानतळावर सुद्धा पाणी साचल्यामुळे विमानसेवेवरही याचा परिणाम झाला आहे. 
मुंबई विमानतळावर पाणी साचाल्यामुळे आणि खराब हवामानामुळे अद्याप एकाही विमानाचे उड्डाण झाले नसल्याचे सांगण्यात येते. तसेच, चार विमाने वळविण्यात आली असल्याची माहिती सीएसआयएच्या अधिका-यांकडून मिळते. दरम्यान, दुसरीकडे हार्बर, मध्य रेल्वेची वाहतूक 15 ते 20 मिनिटे उशिरा सुरु आहे. त्यामुळे याचा फटका चाकरमान्यांना बसला आहे. मुंबई छत्रपती शिवाजी महाराज टर्मिनससह दादर, लोअर परेल,वांद्रे रेल्वे स्टेशनवर चाकरमान्यांनी गर्दी केली आहे. 

Mumbai: Visuals of water logging in Kurla after heavy rain #MumbaiRainspic.twitter.com/9R63bzwf9X

— ANI (@ANI) September 19, 2017

उपनगरातील बोरीवली, गोरेगाव, अंधेरी, विलेपार्ले, बीकेसी, माहीम, दादर, वरळी, महालक्ष्मी, गिरगाव, मरिन ड्राइव्ह, कुलाबा, भायखळा, लालबाग, परळ, सायन, कुर्ला, घाटकोपर, विक्रोळी आणि मुलुंड येथे पावसाने धुमाकूळ घातला. दादरच्या हिंदमाता येथे पाणी साचल्याने वाहतुकीचा प्रचंड खोळंबा झाला आहे. त्यामुळे ठिकठिकाणी वाहतूककोंडी झाली आहे. पावसामुळे भायखळा, लालबाग, परळ,माटुंगा आणि सायन येथे वाहतुकीचा वेग मंदावला. सांताक्रुझ-चेंबूर लिंक रोड, पूर्व उपनगरात लाल बहादूर शास्त्री मार्गावर कुर्ला डेपो, शीतल सिनेमागृह, कमानी आणि घाटकोपर येथील श्रेयस टॉकीज येथील वाहतुकीचा वेग मंदावल्याने वाहतूक कोंडीत वाढ झाली आहे. अनेक ठिकाणी पाणी साचल्याने त्या परिसरातील वाहतूक इतरत्र वळविण्यात आली आहे. याचबरोबर, येत्या 15 तासांमध्ये शहरातील काही भागांमध्ये अतिवृष्टी होण्याचा इशारा हवामान विभागाने दिला आहे.

No flight ops at Chhatrapati Shivaji Airport from 1849 hrs as visibility drops to 25 mts, 4 flights diverted: CSIA PRO #MumbaiRains

— ANI (@ANI) September 19, 2017

 गेल्या महिन्यातील 29 ऑगस्टच्या पावसात झालेले हाल लक्षात घेता चाकरमान्यांनी घरची वाट धरली. तिन्ही मार्गावरील लोकलमध्ये तुडुंब गर्दी झाली आहे. गणेशोत्सव काळात पडलेल्या प्रचंड पावसाचा चाकरमान्यांनी धसका घेत मंगळवारी पडलेल्या पावसामुळे कामावरून लवकर घरी परतण्याचा निर्णय घेतला. त्यामुळे मध्य रेल्वेच्या डाऊन मार्गावरील लोकल गाड्या एरव्हीपेक्षा दोनन तास आधीपासूनच गर्दीने फुल्ल झाल्याची माहिती प्रवाशांनी दिली. त्यामुळे कर्जत, कसारा, बदलापूर, टिटवाला, कल्याण मार्गावरील लोकलमध्ये गर्दी झाली आहे.