असशील सेलिब्रिटी, पण अलिबाग तुझ्या मालकीचे नाही! आमदार जयंत पाटलांनी शाहरुख खानला सुनावले

किंगखान अर्थात शाहरुख खानचा अलिबाग दौरा वादाचा विषय ठरला आहे. आपला वाढदिवस साजरा करून मुंबईला परतलेल्या शाहरुखच्या बोटीमुळे, शेतकरी कामगार पक्षाचे आमदार जयंत पाटील यांना गेटवे आॅफ इंडिया येथे ताटकळत राहावे लागले.

मुंबई : किंगखान अर्थात शाहरुख खानचा अलिबाग दौरा वादाचा विषय ठरला आहे. आपला वाढदिवस साजरा करून मुंबईला परतलेल्या शाहरुखच्या बोटीमुळे, शेतकरी कामगार पक्षाचे आमदार जयंत पाटील यांना गेटवे आॅफ इंडिया येथे ताटकळत राहावे लागले. यामुळे संतप्त झालेल्या जयंत पाटील यांनी, ‘तू अलिबाग विकत घेतले नाहीस... माझ्या परवानगीशिवाय तू अलिबागला येऊ शकत नाहीस...’ असे शाहरुखला सुनावले.
शाहरुख खानने ३ नोव्हेंबर रोजी अलिबागमधील फार्महाउसवर वाढदिवस साजरा केला. त्यानंतर, तो बोटीने अलिबागवरून मुंबईला परतला. त्याची बोट गेटवेच्या जेट्टीवर पोहोचली, तेव्हा बराच वेळ शाहरुख बोटीतच बसून राहिला. शाहरुख आल्याचे समजताच, जेट्टीजवळ त्याच्या चाहत्यांनी गर्दी केली होती.

शाहरूखने काहीच दिली नाही प्रतिक्रिया
पोलिसांनी शाहरुखमुळे जेट्टीवर प्रवाशांना थांबवून ठेवले होते. अलिबागला बोटीने निघालेल्या पाटील यांनाही ताटकळत राहावे लागले. त्यामुळे त्यांचा पारा चढला. त्यांनी त्यांची बोट शाहरुखच्या बोटीजवळ नेली आणि ‘असशील तू मोठा स्टार.. म्हणून काय तू अलिबाग विकत घेतले नाहीस, माझ्या परवानगीशिवाय तू अलिबागला येऊ शकत नाहीस,’ असे सुनावले.
मात्र, शाहरुखने काहीच प्रतिक्रिया दिलेली नाही. पाटील अलिबागकडे निघाले, तेव्हा शाहरुख बोटीतून बाहेर आला आणि गर्दीला हात उंचावून दाखवत निघून गेला.काहींनी या घटनेचा शूट केलेला व्हिडीओ सोशल मीडियावर व्हायरल झाला आहे.