आयआयटीमार्फत सर्वेक्षण

एनएमएमटीच्या बसेस रोज जवळपास ६८ हजार किलोमीटर धावत आहेत. प्रतिकिलोमीटर उपक्रमास ७ रुपयांचा तोटा होत आहे. ४४ पैकी तब्बल ४१ बसमार्ग तोट्यात आहेत.

आयआयटीमार्फत सर्वेक्षण
नामदेव मोरे ल्ल नवी मुंबई
एनएमएमटीच्या बसेस रोज जवळपास ६८ हजार किलोमीटर धावत आहेत. प्रतिकिलोमीटर उपक्रमास ७ रुपयांचा तोटा होत आहे. ४४ पैकी तब्बल ४१ बसमार्ग तोट्यात आहेत. तोटा कमी करण्यासाठी उपक्रमाने आयआयटीमार्फत सर्व बसमार्गांचे सर्वेक्षण करण्याचा निर्णय घेतला आहे.
शहरवासीयांना चांगली बससेवा उपलब्ध करून देण्यासाठी महापालिकेने एनएमएमटी उपक्रम सुरू केला. सद्यस्थितीमध्ये २९७ बसेस नवी मुंबई, ठाणे, कल्याण, डोंबिवली, पनवेल, उरणपर्यंत सेवा देत आहेत. दिवसभरात सर्व बसेसच्या सरासरी १५१२ फेऱ्या होत आहेत. जवळपास ६७१९८ किलोमीटर बसेस धावत असून दिवसाला जवळपास २५ लाख ८० हजार ९३६ रुपये उत्पन्न मिळत आहे. मासिक पासपासून जवळपास २ लाख ८० हजार रूपये उत्पन्न मिळत आहे. परंतु उपक्रम चालविण्यासाठी होणारा खर्च व मिळणारे उत्पन्न यामध्ये मोठी तफावत असल्याची स्पष्ट झाले आहे. प्रतिकिलोमीटर एक बसला ४९ रुपये खर्च होत असून उत्पन्न मात्र ४१ रुपये ९५ पैसे एवढे होत आहे. प्रतिकिलोमीटर ७ रुपये पाच पैसे तोटा होत आहे.
एनएमएमटीचे ४४ पैकी ४१ बसमार्ग तोट्यात सुरू आहेत. फक्त ३ बसमार्ग नफा मिळवून देत आहेत. उपक्रमाचा तोटा कमी करण्यासाठी प्रशासनाने सर्व मार्गांचे आयआयटीमार्फत सर्वेक्षण करण्याचा निर्णय घेतला आहे. संबंधित संस्थेकडे सर्वेक्षणासाठीचे पैसे भरण्यात आले आहेत. लवकरच शास्त्रीय दृष्टिकोनातून सर्वेक्षण होणार आहे. सर्व रेल्वे स्टेशनपासून एमआयडीसीकडे जाणाऱ्या मार्गांचेही सर्वेक्षण करून बससेवेचा विस्तार करण्यात येणार आहे.

जानेवारीपूर्वी प्रतिकिलोमीटर तोटा १० रुपयांपेक्षा जास्त होता. उपक्रमाने तोट्यातील मार्गावरील बसफेऱ्या कमी केल्या आहेत. काही मार्गांवरील बससेवा पूर्णपणे थांबविली आहे. ज्या वेळेमध्ये प्रवाशांची संख्या कमी असते त्या वेळेतील फेऱ्या कमी केल्या आहेत. दोन वर्षापूर्वी तिकीटवाढीचा प्रस्ताव मंजूर करण्यात आला होता. परिवहन प्राधिकरणाने मंजुरी दिल्यानंतर सर्वसाधारण सभेने हा ठराव रद्द केला. यामुळे उत्पन्नात वाढ होऊ शकलेली नाही. तिकिटाचे दर कमी आहेत.

सर्वाधिक प्रतिकिमी तोट्यातील मार्ग
मार्गतोटा रु.
वाशी ते कळंबोली (बसमार्ग १९)२८
सीबीडी ते ठाणे (बसमार्ग २९)२७.५४
करावे ते नेरूळ (बसमार्ग १५)२८.६६
वाशी ते ठाणे (बसमार्ग १)२४.६६
सीबीडी ते ठाणे (बसमार्ग २९)२७.५४

नफ्यात सुरू असलेले मार्ग
खारघर रेल्वे स्थानक ते तळोजा (बसमार्ग ५४)
मानसरोवर रेल्वे स्टेशन ते खांदेश्वर (बसमार्ग ५७)
खारघर ते बोरिवली वातानुकूलित बससेवा (बसमार्ग १२३)