विमानतळ नामकरणासाठी प्रकल्पग्रस्त आज ‘सिडको’वर धडकणार

सायन-पनवेल महामार्ग वाहतुकीसाठी बंद : महामार्गावरील वाहतूक शिळफाटामार्गे वळविण्यात येणार

लोकमत न्यूज नेटवर्क

नवी मुंबई : नवी मुंबई आंतरराष्ट्रीय विमानतळाला प्रकल्पग्रस्तांचे नेते दि. बा. पाटील यांचे नाव द्यावे, या मागणीसाठी प्रकल्पग्रस्त सिडको भवनला गुरुवारी घेराव घालणार आहेत. आंदोलनाची तीव्रता लक्षात घेऊन पोलिसांनी सायन-पनवेल महामार्गावरील वाहतूक सकाळी आठ ते रात्री आठच्या दरम्यान बंद करण्याचा निर्णय घेतला आहे. उरण फाटा ते खारघर दरम्यानचा रस्ता वाहतुकीसाठी बंद केला असून, महामार्गावरील वाहतूक शिळफाटामार्गे वळविण्यात आली आहे.

ठाणे, रायगड, मुंबई, पालघर जिल्ह्यांमधील आगरी कोळी नागरिक व नवी मुंबईमधील प्रकल्पग्रस्त आंदोलनात सहभागी होणार आहेत. सिडकोला घेराव घालण्यासाठी हजारो आंदोलक जमा होण्याची शक्यता गृहीत धरून पोलिसांनीही कडक बंदोबस्त ठेवला आहे. नाशिक, पुणे येथून जादा पोलीस मनुष्यबळ तैनात केले आहे. सात हजारांपेक्षा जास्त पोलीस अधिकारी, कर्मचारी बंदोबस्तासाठी तैनात असणार आहेत. आंदोलनादरम्यान कायदा व सुव्यवस्थेचा प्रश्न निर्माण होऊ नये यासाठी सायन-पनवेल महामार्गावर उरण फाटा ते खारघरदरम्यान वाहतूक पूर्णपणे बंद करण्यात येणार आहे. सकाळी आठ ते रात्री आठपर्यंत ही बंदी राहणार आहे. याशिवाय किल्ला जंक्शन, सीबीडी महाकाली चौक, पार्क हॉटेल व जुन्या महानगरपालिका मुख्यालयाकडून सिडको भवनकडे येणारे रस्तेही वाहतुकीसाठी पूर्णपणे बंद केले जाणार आहेत.

मुंबईवरून पुण्याकडे जाणारी वाहतूक नवी मंबईतून महापे, शिळफाटामार्गे कळंबोली सर्कलकडे वळविण्यात येणार आहे. पुण्याकडून येणारी वाहने पुरुषार्थ पेट्रोल पंपापासून तळोजा एमआयडीसी, रोड पालीकडून शिळफाटा, महापे, ऐरोलीकडून मुंबईकडे सोडण्यात येणार आहेत. अवजड वाहनांना नवी मुुंबईच्या परिसरात येण्यास व येथून बाहेर जाण्यास पूर्णपणे बंदी घालण्यात येणार आहे.

वाहतूक कोंडीची शक्यता

सायन-पनवेल महामार्गावर उरण फाटा ते खारघरदरम्यान रस्ते बंद केेले जाणार आहेत. पामबीच रोडही वाहतुकीसाठी बंद राहणार आहे. सीबीडी व बेलापूरमधील रस्तेही बंद करण्यात येणार आहेत. वाहतुकीमधील बदलाची माहिती सगळ्यांना न समजल्यास वाशी टोलनाका व पनवेल परिसरात महामार्गावर वाहतुकीची कोंडी होण्याची शक्यता आहे.